應屆港姐冠軍林敏俐的亡父林國光，曾經任職成人雜誌《龍虎豹》，又自資出版《男子漢》，有傳媒以「鹹書大亨」來形容他。林敏俐昨日回應說父親曾否做過亦冇所謂，因為每人都有過去，她更自爆曾經賣月餅及做蛋撻皮賺錢。
昨日有報道指新出爐的港姐冠軍林敏俐，其已故父親林國光是本港資深傳媒人，曾以辦成人雜誌出位，包括曾任職《龍虎豹》和自資出版《男子漢》，有「鹹書大亨」之稱。林父更與不少人結怨，最後因心灰意冷而舉家移民三藩市開餐館。
昨日林敏俐請十多位港姐在金鐘萬豪酒店食自助餐，因賽前眾佳麗約定誰奪冠軍便要請食飯。對於有關其父的報道，林敏俐說：「我睇咗報道，對於呢件事我唔介懷，細個時聽媽咪講話爹哋做過報館編緝，但詳情就冇講，今朝睇報紙覺得有啲surprise（驚奇），印象之中爹哋係港聞出身，唔會寫啲核突嘢。」
問林敏俐可擔心此事會影響港姐形象，她說：「唔擔心，爸爸還爸爸，我還我，就算佢真係有做過都冇所謂，每個人都有過去，而且爸爸已經唔喺度，想問番佢都問唔到。佢係揸揸吓車心臟病發過身嘅，記得嗰日爸爸入咗醫院，初時以為佢有得救，估唔到救唔番。」
問林敏俐可知父親和人結怨？她說：「我冇聽過佢同人結怨，今時今日屋企有兩間酒樓、三間茶餐廳，都係爹哋媽咪捱番嚟，我唔係一出世就有錢，亦唔係太子女，我喺三藩市都試過親手做蛋撻皮同賣月餅。
「本來我諗住選完之後返去打理生意，因為不嬲由我打理開，媽咪話佢會頂住先，但我一定會堅持完成大學學位，或者考慮將啲學分轉返嚟香港大學讀，𠵱家攞咗港姐冠軍，我亦唔覺得自己好巴閉。」
而其他落選港姐亦紛紛表態支持林敏俐，關伊彤說：「呢啲係佢爸爸嘅職業，對佢冇影響，而且佢爸爸又過咗身。」
攝影：羅德光