股壇瀏覽器:中移動多數唔派息

股壇瀏覽器:中移動多數唔派息

港股噚日下午無情情急升,收10100,升140點。買盤主要集中在長和系及中移動(941),擺明係有芬佬趁港股成交薄弱之際挾淡倉。
黑客話,港股連續3個月期指結算都係由淡倉主導,搞到散戶冇晒癮,紛紛離場,今次輪都輪到好倉主導,吸引散戶重新入市。市場現時留意中移動會否派中期息,不過都係冇得派居多,因為中移動發債一事到𠵱家都未搞掂,當然會留番多點現金喺身邊。

兆晉傳復牌後大炒
i師傅話,上周四停牌嘅兆晉國際(491)副主席劉國輝手貨將被沽出,有新股東入駐,兆晉將於本周復牌。由於大股東押股事件告一段落,新幕後人亦會隨之入市維持秩序,據聞復牌後股價有可能大幅挾高,先來一個下馬威,增強散戶上車信心,阿虎即管拭目以待。其實好多有實力嘅莊家,經過細價股股災之後,到𠵱家都冇意思搞搞震,免得抽高股價,放生散戶手上嘅蟹貨。
生命科技(1180)據聞又話要請芬佬及財經界到山東睇廠,相信又係為咗威海賽洛金藥業引入資金鋪路。據Cookie話,一旦成功引入策略性投資者,生命科技股價隨時會抽上去0.30元水平。
吉林化工(368)股價噚日插水,跌10%,收0.61元。此股將於下周四公布中期業績,首季已蝕逾億元人民幣,市場估計今次中期會繼續錄得虧損,由於此股於2000年及2001年已錄得虧損,今年若未能扭虧為盈,A股將要進入除牌程序,可能因此有人偷步沽貨。不過,由於佢嘅母公司係中石油(857),若果阿媽肯幫佢重組,吉化相信可以逃過除牌一劫。
阿虎