我Apple姐係一個佔有慾好強嘅人，絕對接受唔到老公有另外一個女人，所以我對嗰啲老公擺到明有外遇，重可以隻眼開隻眼閉嘅女人，真係佩服到五體投地。 賞珠寶心情佳 嗱，好似趙世光咁，經常同佢個紅顏知己譚玉梅俾記者影到約會嘅相，但係佢太太何琍琍又真係好睇得開噃。上個禮拜之嘛，我就喺中環間名店VanCleef&Arpels度遇見何琍琍同個女性朋友一齊睇珠寶，佢一入到間舖，啲職員已經當佢上賓咁招呼，而何琍琍嗰日嘅心情睇嚟十分之靚，佢老公嘅風流帳，似乎都唔當係乜嘢一回事。