英皇3T小花之一嘅鄭希怡（Yumiko）噚日到葵芳新都會廣場接受訪問，Yumiko戴上由成龍送畀佢嘅手表，佢話：「呢隻表我哋3T個個都有，係大哥去意大利買返嚟嘅手信，順便鼓勵我哋，叫我哋努力啲。」
Yumiko重話最近勤於學彈結他、鋼琴同打鼓，佢話：「其實我好細個已經學彈琴，但係嗰時因為被屋企人迫我學，所以就冇考過試，啲人問我有幾多級我都答唔到。」而由於Yumiko係家中嘅獨女，所以家人都要佢學好多嘢，好似水墨畫同芭蕾舞。
而何韻詩噚日亦都去咗新都會廣場做訪問，阿詩重帶埋隻好可愛嘅貓嚟，阿詩隻貓都算係人見人愛，個個見到都忍唔住摸吓佢，問到阿詩做乜帶埋隻貓嚟做訪問？阿詩話：「冇呀，電台叫㗎嘛，原本想帶埋隻大貓嚟，但係佢太曳啦，噚晚佢喺我張床度賴屎，搞到我凌晨四點幾返到屋企重要同佢執手尾，所以咪罰吓佢，唔帶佢嚟囉！」
張惠妹同庾澄慶（Harlem）前日喺台灣齊齊出席音樂節目《音樂大不同》，佢哋喺節目合唱咗兩首張雨生嘅作品《我期待》同《最愛的人傷我最深》。今次阿妹同Harlem同台演唱，選擇唱出佢哋已過世恩師張雨生嘅歌，阿妹表示每次唱出佢嘅歌時，都會令佢有想喊嘅衝動，佢重話：「我喜歡唱張雨生的歌曲，因為旋律都是我熟悉的。」
肥媽瑪利亞最近同名古屋餅店拍咗一輯「迷你極品燕窩冰皮」月餅電視同硬照廣告，為咗拍呢個廣告，肥媽話佢足足食咗百幾個月餅咁多，肥媽重一邊食一邊嗌「救命」。原來肥媽喺廣告入面要用佢把雄厚嘅聲線唱「救命歌」，意思係啲月餅好食到要嗌救命咁話。
沈殿霞（肥肥）噚日去咗深圳出席寢室用品Sinomax嘅宣傳活動，佢重親自發出一份聲明，內容係不滿有同類產品公司跟肥肥嘅合作關係結束咗，但重繼續播放佢拍嘅廣告，肥肥話：「我對內地嘅肖像權問題好激氣，所以我一定要發出聲明。」
顧紀筠噚日喺又一城出席活動，佢一向都係以精明形象見稱，最近佢喺港台主持一個新節目《與CEO對話》，佢邀請好多大集團嘅揸弗人喺節目裏面，講吓佢哋成功秘訣同管理心得，其實顧紀筠本身都係一個成功商界女強人，不過呢位女強人同普通女人一樣，最唔滿意就係自己身上嘅豬腩肉！
台灣歌手陳昇早前喺台北一家酒吧遭人用酒瓶襲擊頭部受傷，送咗入台北國泰醫院接受手術，出院後都已經康復得七七八八。陳昇噚日就返咗去醫院，喺下午做一個「頭蓋骨復位」手術，將上次開刀取出嘅受傷頭蓋骨植回。而因為呢次意外，陳昇已經冇再出入酒吧，以免再惹麻煩。