聲稱喺珀麗灣內購中，受到首席銷售代理仲量聯行不公平對待嘅利嘉閣，前晚大大聲講會發嚴正聲明，但結果利記董事總經理何紹章話，經過發展商、仲量聯行同利記溝通後，大家覺得，不如大事化小，小事化無，一切以和為貴。
不過，利記噚日就真喺罷做珀麗灣一日，何紹章解釋，想紓緩員工積埋的不滿情緒。
利記同中原老闆施永青就對利記罷工一事支吾以對，一時話啱啱先知，一時又反問番記者點睇，最後重彈咗句「佢哋不嬲都鍾意自把自為㗎啦！」語氣好似有啲不滿，但又即刻兜番，話係自己訓練佢哋自把自為嘅，邊得閒管咁多。施老闆又透露，早前佢為花旗銀行拍咗輯廣告，但太座唔高興，覺得有啲市儈，所以以後都唔再拍。
另外，中記就話佢周一做咗四個珀麗灣成交，連埋上周總共二百五十單，周一晚即刻拉隊去慶祝。
美聯執行董事張錦成就話，珀麗灣內購冇唔公平，又呼籲同行要抑制，唔好影響賣樓流程。他解釋，新地以抽籤形式，安排代理籌數，而佢哋可取得較多，主要因入票多。
最近由亞太地產獨家代理嘅大潭紅山半島70號董事屋，放售方式都幾特別，唔係招標，但一樣有截止日期，原因係個業主急於要喺今個月15號前完成交易，但又唔想搞咁多行政程序，於是定咗日期，價高者得。
紅山半島全個屋苑只有6間董事屋，近幾年都無呢類放盤。除咗其中兩間仍由發展商持有之外，其餘4間大部份畀發展商友好一手買入，據悉剛過檔電盈嘅李智康同至祥前老闆吳國璋都係業主。
至於今次放盤業主係印籍商人，喺灣仔經營咗四十幾年地氈生意，91年以八百三十萬向發展商友好買入七十號董事屋，由於舉家即將移居美國，香港業務亦會結束，佢同時放售灣仔告士打道265號地下連一樓嘅舖頭，一屋一舖銀行估值共三千六百萬。睇嚟業主肯定有得賺。
港島龍頭屋苑太古城，上周錄得一宗自製相連單位成交，呎價高市價逾8%。單交易係世紀21安居樂爆出嚟，重話係佢哋成嘅，但噚日中記就話其實係佢哋做嘅，一時間鬧出雙胞胎，究竟邊個先係真命天子呢？
蘭西向中記查詢，佢哋好勞氣咁話，係由齊宮閣分行客戶經理陳曉章（圖二）用咗個半月時間，主動游說其中一個業主轉租為賣，先能夠製造到相連戶，做成呢單買賣。辛苦咗咁耐先做成單大嘢，梗係想出名威吓嘅。
蘭西又向世紀21查詢，佢哋解釋話因為同個客熟，所以知道來龍去脈，報料畀傳媒。
呢個相連單位係海景花園美菊閣高層B及C室，B室1137方呎，成交價543萬，而C室983方呎，造價440萬元。
近期新盤焦點馬灣珀麗灣，內購已經完結，代理行開始為公開發售而忙於拉客入票，美聯特別訂製100匹足金駿馬（圖三），準備送畀首50名買家，促成買賣嘅員工亦有份。美聯透露，每隻金馬值千幾蚊，夾埋要十多萬，連同早前用於印刷、寄宣傳單張，以及各項推廣廣告，有關珀麗灣的宣傳費用耗資二百萬元！另外，香港置業就會送15套仿屋苑遊艇藍鯨號嘅水晶船，畀首15個買家，聽講總值都萬萬聲㗎。
蘭西
電郵地址：