所謂「經一事長一智」，但曾因講錯嘢而冇咗英格蘭領隊份工嘅荷杜，似乎唔太明白呢個道理。如果佢係學精咗，又點會無端端走出嚟侮辱曲波。
𠵱家喺熱刺教波嘅荷杜，日前唔知食錯啲乜嘢，猛咁踩新加盟嘅中國小將曲波；佢居然咁話：「曲波佢重未準備好喺超聯落場，但佢有發展潛力，所以我哋覺得呢筆投資係值得。有報道話我哋畀咗兩百萬鎊，這簡直荒謬到極；事實就係我哋只係用咗十五萬鎊借用佢一年。」
話晒曲波都係自己友，荷杜唔撐佢之餘，重講埋啲有歧視成份嘅嘢，真係好唔啱。我求大俠唔敢話曲波值兩百萬鎊，但如果連李斯特城生牯仔比柏呢啲𡃁仔都值成三百萬鎊，咁樣踢過世界盃兼代表過中國成二十次嘅曲波，究竟值幾多，大家應該心中有數。
荷杜喺三年幾前因為講咗啲侮辱傷殘人士嘅嘢，搞到俾英足總炒魷；估唔到佢冇因此而學精，把口繼續唔收。如果佢再係咁，遲早又搞出事。
曼聯中場堅尼喺佢本自傳度踢爆自己，當年係特登踢傷曼城中場夏蘭特，以報復對方踢傷佢而搞到佢差啲收山，𠵱家就搞到一身蟻；佢除咗有可能俾夏蘭特民事起訴外，重面臨英足總嘅處分。我求大俠雖然欣賞堅尼敢做敢認嘅性格，但就覺得佢咁樣自己前途飛，真係好。
新加盟米杜士堡嘅意大利前鋒馬卡朗尼，話好欣賞帝國驕雄（Gladiator）呢套電影，重話想好似戲中嘅男主角羅素卻爾咁，將對方殺個片甲不留。馬卡朗尼咁有大志，對米記嚟講的確係件好事；但係超聯嘅水準有別於意乙聯，所以如果佢想攞多啲入球，睇嚟要畀心機練好啲波。
日前又有意大利報章引述朗拿度嘅想離隊宣言，內容主要係話佢唔喜歡意大利嘅防守踢法，鍾意西班牙波喎。另外，有個自稱係哨牙仔老友，爆料話國米教練古柏處處針對哨牙仔，搞到哨牙仔想走。睇嚟朗拿度欲離國米呢件事餘波未了，我求大俠會密切留意。