今年會考十優狀元，共有十五位，《成報》報道得最好，十五幅狀元大頭相片，個個都係靚仔靚女，令天下父母覺得：「有子有女當如是」之嘆。
十五位狀元之中，有兩個名字最突出，左丁山一見難忘。一位係聖約瑟書院嘅「凌霄志」，一位係皇仁書院嘅「莊奮飛」。
姓凌，名霄志，真乃神來之筆，考到十優，更加匹配，呢位狀元嘅父母，相信對兒子抱有極大期望，望子成龍，取名如此，父母亦有文化之人也。
莊奮飛，極不簡單。「奮飛」即係振翼而飛，出自《詩經》〈邶風〉一首詩「柏舟」，呢首詩最尾兩句，就係「靜言思之，不能奮飛」，根據台灣文化圖書公司出版嘅《名詩名詞欣賞》，呢兩句嘅語譯係：「靜靜地細作思量，怎的不能振翅飛翔」。
再查《辭海》，內有一條引張說《撥川郡王碑》，有「奮飛橫絕，博空直上」之句。於此可見，「奮飛」係胸懷大志，希望能夠如大鵬展翅，扶搖而上九萬里之意。為子取名「奮飛」，可見狀元莊嘅雙親，對佢寄望甚殷。
咁多年來，十優狀元多到數唔晒，左丁山記唔起一位半位，但今年狀元之中，竟有「凌霄志」、「莊奮飛」呢兩個咁令人驚喜嘅名字，令人為之眼前一亮，想唔記得都幾難。只望呢兩位小弟弟能繼續向上再登高峯，唔會「小時了了，大未必佳。」
莊同學對記者講：「十A都未必有用，大學畢業生月薪只係六七千。」講呢句話就冇乜志氣嘞，未讀大學就諗住將來有幾多薪水，唔似識飛喎。