恒豐金業（870）噚日失驚無神急升13.4%，收11仙，剛好脫離仙班，雖然成交奀豬豬，只得84萬銀，但個棚就搭得好勁，懶熱鬧咁款。經紀陳話，缸湖傳聞恒豐想配股，但唔係散批出街嗰種，而係由一條友接晒批貨。換句話說，即係有策略性投資者入股咁解。
講開恒豐，除咗金廁所之外，近期最出位睇怕都係出6000元一個月招請大學生。話佢製造就業機會又得，話佢貶低大學生身價都得，總之就在社會上製造到唔少聲音，可以算係一種市場推廣策略。
經紀陳話，恒豐早排出完業績無耐，市場已經盛傳佢會配股，但剛剛遇着仙股風波，跟住就冇晒聲氣。
至於批股呢個傳聞炒唔炒得，小初就唔敢講，皆因隻股發行股數唔係少，有成53.9億股咁多，聽聞重分得好散，炒上會有一定難度。當然，最重要就係有冇人肯拎錢出嚟炒作。
慕容小初