近期日圓保持喺六五幾呢個高水位，買日本AV產品就算唔貴，怕且都唔會平得去邊。咁又未必，皆因有電器舖一於好少理，實行將部份MD機割價平賣益街訪，當中更不乏新型號，好似剛剛月頭先至到貨嘅PanasonicSJ-MR250呢部NetMD機，轉個頭就已經比開賣時平足足五百有多，睇啱型號就不妨趁低價掃番部。
記者：招佩珊 攝影：周旭文 ImageGirl：Cody
SHARP呢款MD機用上雙面設計，無論擰前擰後都一樣可作機面，呢款嶄新的外觀設計市面比較少見。MD-ST700其中一面以圓形為主，外面就有5個分別備有開關、選曲、調校音量等功能的操控鍵，大圓形的中間設有MDLP專用燈仔，當以MDLP2或MDLP4錄播時，呢盞燈仔會有不同的閃動頻率作識別。講到內涵，MD-ST700備有省電功能，在鎳氫電池及外置式2A電池雙電齊用的情況下，最高可連續播放155小時。
查實呢部SJ-MJ50比同門SJ-MJ250更早一步玩喇叭裝置，而且重唔使左駁右駁咁麻煩，可以將部MD機直接插入呢個喇叭座，唔好睇佢細細個，但同樣可以分開左、右兩個聲道，有如一部迷你Hi-Fi，而喇叭座亦有充電功能，用家可以一邊聽歌，一邊叉電兼放電。雖然SJ-MJ50只屬一部齋PlayMD機，但亦有齊MDLP、S-XBS重低音及防震等功能。
SJ-MR250是Panasonic旗下首部NetMD機，用家可利用跟機的多功底座及USB連接線，將電腦上的網絡音樂與SJ-MR250聯繫；透過跟機的《BeatJam》軟件，可將一般音樂格式轉為SJ-MR250可作錄播的OpenMG格式，能夠對應到的音樂格式就更廣。配備一對輸出有900mW+900mW的小喇叭，隨身聽立即變成迷你Hi-Fi。佢亦備有家陣最流行的MDLP2及MDLP4功能，以及40秒、80秒、160秒防震記憶系統，絕對稱得上是功能齊備的MD機。
手機換殼就聽得多，估唔到連MD機都一樣有，不過並非換機身外殼，而是將個線控換殼玩變色。其實線控比機身更適合玩換殼，試想想夾喺衣領或手袋的是線控還是MD機？至於呢部齋PlayMD機，備有MDLP延長錄放功能，跟機會有個直立式充電座，要將部MD機插在座上才可進行充電。
新機輩出，家陣確實有不少更細更輕的新型號，不過SJ-MR220ED亦曾經成為最細、最輕、最長播放時間的機種，現時同樣備有錄播功能的同類MD機，以其112克的重量算得上是非常輕巧。
齋PlayMD機一部，有齊MDLP及防震功能，講賣點，的確略遜於有喇叭及換殼的款式，不過DMC-P33勝在夠細夠輕，六百幾蚊就買到部齋PlayMD機，重想點？
永明影音中心
地址：旺角洗衣街77號地下
電話：23997991