早前雷諾車廠宣布推出新款MeganeⅡ，好多車迷都俾佢嗰個咁獨特嘅造型深深咁吸引住；最近外國方面又有消息傳出，謂廠方正落力研製新一代Scenic，快者重可望於2003年底現身㖭。
新版Scenic嘅造型較現有型號來得更具吸引力，車身線條變得圓渾有致之餘，全新嘅車尾配搭亦教人為之心動，當中直立式尾燈編排及闊大尾窗設計，更為重點之一；車廂布局則會與現有Scenic一樣以實用為先，空間不單止闊落舒適，中控台上嘅設備又見齊全，用落重好方便㖭。而廠方為顧及不同用家需要，特別提供多台引擎供選擇，包括1.4公升（80匹）、1.6公升（115匹）及2.0公升（136匹）等型號，另外重備有ABS及BrakeAssist等系統，以確保行車安全。新車快者可望於2003年底面世，各位車迷記住留意喇。