港股昨日上晝重係極度牛皮，半日成交僅20億，好彩下晝3點過後挾淡倉，個市有番啲波幅，全日成交增至近50億，恒指升140點，重上10日同20日線。不過，港股能否轉勢，重要睇聯儲局議息結果同美股表現，以及中移動（941）嘅業績，暫時唔適宜太過樂觀。
久沉嘅和黃（013）是日反彈3%，收報52.5元，帶動多隻和黃Call輪彈彈跳，10大威水輪當中，和黃Call輪佔咗6件，而且霸晒頭4位。
排頭位嗰件9258，現價4.1仙，10月30日屆滿，溢價26.5%，槓桿率128倍。呢隻輪揸到尾好易會輸晒，因其行使價66元，正股要喺個半月內升26%，隻輪先至開始有價值，論機會唔係冇，只係好微。排第2至第4位嘅和黃Call輪，分別係9291、9317同9348，行使價為63元、80元同73元，分別喺10月、12月同11月到期，佢哋到尾作廢嘅機會一樣唔細。
和黃跌咗咁多，再有反彈唔奇，但和黃Call輪就唔易揀，太近期嘅風險好高，行使價相距太遠嘅亦冇謂諗。左睇右睇，得隻9226可以考慮吓，行使價60.53元，比正股現價高15%，但11月8日至到期，重有多少機會出生天。
章盛