前晚駕車輾傷記者隻腳嘅財政司司長梁錦松，噚晚同伏明霞盛裝去禮賓府赴宴。今次應該係梁、伏成親後，阿松首度帶霞女，以司長夫人身份公開亮相官方活動，介紹畀大家認識。
據八方所知，特首昨晚宴請上一屆行會成員，一共兩圍枱，大家都好畀面，重帶埋另一半去飲番杯。伏明霞着咗一襲黑衫，好靚。不過在場班人就唔好意思問佢是否有喜，重叫八方自己問阿松。
當中楊鐵樑夫人最風趣，佢話早前同楊官食晏，已經碰過一對新人，重話梁太同阿松好登對，大家客客氣氣傾吓偈，話題離唔開體育。八方八卦，問楊夫人，阿松有冇邀請佢兩夫婦呢個星期五去飲喜酒？楊太笑說，大庭廣眾，邊好意思講喜酒。咦！如果真係咁高興，唔知阿松會唔會請埋八方去飲杯，還是謝絕採訪？
阿松在壽臣山話府邸呢輪都好旺，記者川流不息，就係為咗求證伏明霞懷孕的消息。前晚六時四十五分，阿松駕駛保時捷跑車載住伏明霞返回官邸，門外十多名記者趨前，混亂中一名報館記者被車輪輾過右腳掌受傷，報警送院治理。事後，阿松發表聲明對事件深表遺憾，並祝受傷記者早日康復。
噚日朝早十時二十五分，兩名交通部警員抵達官邸，檢查前晚涉及意外嘅保時捷跑車，警員重喺意外現場量度及拍照存檔，逗留約半個小時始離去。
至傍晚七時，梁錦松乘車返回官邸，顯得好輕鬆，並同記者揮手，逗留十五分鐘後就由司機接送到禮賓府出席晚宴。
傳真︰2623-9278
電郵︰