趙飛雲上個禮拜講過港股好淡四六波，但其實內心深處則希望好友打爭氣波，周一以「恒指10日線回升」為題希望激勵士氣，點知好友手軟兼腳軟，恒指跌54點收市，收9959，10日線剛回升2日又再回頭，真係歎一句好友唔易做。
聯儲局周二晚才議息，但按牌面分析，美股上周已借減息先行炒高，今勻無論格老減息與否，美股都有回吐壓力，如果今晚公布嘅7月份零售數據較預期差，杜指壓力更加大。
杜指7月尾至今，形成平頂三角形，頂部阻力於8770，升軌支持在8230，三角形運行近尾聲，將現突破。如按現時嘅基本因素睇，杜指向下突破機會大，加上噚日外圍美股期指下跌，因此港股偏軟好正常。
不過，市場內永遠係極少數人贏錢，突發因素散戶唔易知，若單從圖表分析，則唔可以睇淡杜指，而且近期有唔少人覺得美股有隻無形之手同淡友拗手瓜。
講咗咁多，其實趙飛雲只係想講四六波仍然有得打，形勢雖有利造淡，但現時偷步造淡只宜小注，慎防出現變數。
倉內嘅百江燃氣（8132）逆市造好，今日公布中期業績，短炒可考慮伺機獲利，中線則依然看好。
趙飛雲