聯儲局議息前夕，港股果然十分牛皮，恒指全日波幅只係110點，成交唔夠44億元，咁嘅市況，你話經紀點搵食？
恒指昨挫54點，咪以為揸咗Put輪一定有着數，近排市況牛皮，8月、9月甚至10月到期嘅窩輪，不論Call或Put，好多都縮緊溢價，所以即使「買中」咗，如果正股股價只係升跌兩三個價位，一樣冇錢贏，甚至輸錢。
早排建議吼住低吸嘅新地Put輪9432，昨日算有合理表現，正股（016）跌1.75元，佢升8仙，跟得算貼。
9432現價94仙，明年2月先至到期，溢價8.5%，槓桿率5.5倍，數據唔算好靚，但其他新地Put輪亦唔平。9127近乎平水，槓桿率10.6倍，似乎好吸引，但本月28日就到期，風險好高，唔受得起刺激而又睇淡新地嘅，都係9432啱玩啲。
新地勢弱，但華創（291）走勢似有起色，昨日逆市而升3%，收8.4元，但有件華創Call輪9359不升反跌1%，皆因溢價逾20%，要縮水。
華創輪當中以9368數據較好，溢價6.3%，槓桿率9倍，玩到年底，相信較能跟貼正股表現。
章 盛