前晚十一點幾，梅艷芳（阿梅）由澳洲做完個唱返港，同行嘅有蔡一智、陳淑芬同埋十幾個工作人員。點知有二十幾個fans圍成人牆保護阿梅，唔畀記者影相，但阿梅最後都企定定畀記者影相，佢重叫fans唔好企咁埋，因為佢傷風感冒唔想傳染畀大家。
問阿梅演藝人協會幫陳寶蓮搞追悼會嘅進展如何?阿梅話自己呢排唔喺香港，所以要了解一吓先。
李進同李敏兩夫婦前晚喺海南島返港，佢哋話此行係幫新人蕭正楠拍嘢，而古巨基就由北京返港，但佢話過兩日又要返去拍《還珠格格3》。
而前晚喺西藏返港嘅梁詠琪（GiGi），今次係幫聯合國兒童基金會專程去西藏做嘢，GiGi總共去咗六、七日，佢話行程都幾辛苦，前晚有三、四十個fans去機場接機，送公仔畀GiGi，場面都幾混亂。
此外，陳奕迅噚日喺馬來西亞做完宣傳返港，對於霆鋒退休半年，打算環遊世界，佢話：「我都想吖，但唔會咁做，𠵱家我都幾拼（搏命）！」
而鍾麗緹噚晚同女兒喺北京返港，男友因有工作在身所以未有同行。
港姐朱凱婷前幾日為無綫嘅新節目《少小回鄉情》擔任主持，重同埋一班小朋友齊齊返廣東花都市，了解呢班小朋友第一次返內地嘅心情，順便畀班小朋友體驗一吓鄉村嘅生活，而朱凱婷亦趁呢個機會試一吓內地嘅泥漿浸浴，浸完之後佢重話幾正喎！
台灣女歌手陳綺貞接咗個音樂劇《十八相送》，佢噚日同導演林奕華喺尖沙嘴開記者會，個音樂劇會喺下個月二十七至二十九號喺葵青劇院演出，古仔入面有好多分手場面，陳綺貞話分手對佢嚟講係好恐怖嘅事，最好唔好發生喺自己身上，不過佢自己都曾經有過同男友分手嘅經歷。
關心妍（Jade）噚日去葵芳出席新城活動，講到對現代女性嘅睇法，Jade就話：「女仔通常有理想就冇男人，我覺得好慘，如果畀我揀，我都會揀工作先，因為比較實際。」唔知係咪咁，所以佢提到緋聞男友吳學明就即刻話唔講。
英皇高層霍紋希(Mani)早幾日接受新城電台嘅訪問，一直有報道話Twins係英皇賺錢最多嘅藝人，所以容祖兒(Joey)被冷落，Mani話：「其實好多傳媒都睇到我出席Joey嘅活動較多，而Joey喺我心目中嘅位置好重要。不過我盡可能都會去唔同藝人嘅活動。」Mani重話由於彭淑霞離職，佢會處理有關霆鋒嘅工作。
陳芷菁噚日去葵芳新都會廣場出席新城嘅訪問，早前亞視《群星情報站》節目採訪F4喺香港舉行嘅百事記招被拒，有份主持《群》嘅芷菁話：「我哋已經寄咗信去美國嘅百事，想了解番情況。佢哋夠膽拒絕，但就唔夠膽講點解，淨係話不能透露，咁樣唔公道。」