港股繼續牛皮，恒指收報9959，跌54點，成交44億元。長實（001）及和黃（013）持續受壓，中移動（941）中期業績難有驚喜，但股價尚算硬朗，唔通真係有人博佢派中期息？長江生命科技（8222）不斷爆出有關張令玉嘅不利消息，雖然佢已經一一否認，但市場卻要問一個問題，以長科咁大間公司，點解搵唔到一個具知名度嘅國際級科研人才加盟？事件搞到班炒家冇晒癮，雖然貨源已經歸邊，但仍缺乏炒上雄心。
光大銀行押後上市就係人都知，但箇中原因則眾說紛紜，有人話市況唔啱，亦有人話佢資產質素未過關，而最新嘅版本竟然係光大銀行可能涉及逃稅，及與光大集團有一連串問題交易，連累到光大控股（165）遭拋售，股價一度跌逾20%。不過，港交所（388）仍未叫停光控及要求佢澄清，同上一次tom.com（8001）收購亞視消息曝光後，麗新系冇停牌可謂互相輝映。
港交所似乎仍未有吸取麗新系事件教訓，雖則話停唔停牌要由公司自己主動申請，但有時明知股份出現股價敏感消息，港交所都可以主動停佢牌，等市場搞清楚件事至畀佢復牌。現時國內傳媒消息多多，好多時都唔知真定假，港交所要小心處理呢類問題。
銀河映像捲土重來，今日公布招股詳情，據聞每股作價0.30元，發售1.5億股，其中45%為舊股。聽講搞手負責人仍在努力圍飛，而且四處同人講話華仔拍心口包底，又話華仔嘅證券界友好「愛美麗」亦會頂價。不過e莎莉收到風，話「愛美麗」聽到呢件事非常不滿，因為佢哋根本冇咁講，對方明顯擺佢哋上枱，因此希望各位唔好聽信此類傳聞，總之華仔係持有銀河約1成股權，但冇同人講過包底。
阿 虎