以前洗衣機、雪櫃呢類家電，外形都係白雪雪，講得好聽就係樸實，難聽啲就係睇到發悶！幸好日本近年興喺家電上玩顏色，連洗衣機都加塊靚靚嘅半透明機頂蓋。今年呢類玩透明Feel嘅水葉式洗衣機喺香港大行其道，唔單止日本機，就連韓國牌子都有推出，認真唔講得笑！除咗樣靚外，功能當然不可忽視，當中以日立最新標榜特快洗衣功能的機款最為矚目。
記者：張穎倫
攝影：陳穎
ImageGirl：Suki
呢部機嘅機頂蓋，透明部份唔算大，而且選用較保守的茶色，外觀上唔算有太大驚喜。佢標榜洗0.8公斤或以下的衣物，只需11分鐘搞掂，雖然唔係咁實際，不過就夠晒突破！此機新設的特快洗衣功能，以強力水流由上而下、以中心循環四射，迅速洗透衣物每一角落，現時市面其他牌子的洗衣機，同樣洗0.8公斤衣物的話，最快都要20分鐘，足足快咗9分鐘㗎！
型號：日立SF-S600X
洗衣量：5公斤
乾衣速度：750轉
體積：W500×H960×D513mm
售價：約$2,680（各大電器行）
可能你會擔心，11分鐘咁快，啲衫會唔會洗得唔乾淨？呢部機特設藍色洗衣蓋，將衣物壓喺水面下洗滌，形成洗衫板嘅搓揉效果，加埋強力水流，雙管齊下就夠晒乾淨啦！
由電腦自動感應衣物重量、質料，調節水位、水流，一按特快、浸洗等按鈕就即時開動，極之易用。值得一提係旋洗功能，可以做到仿乾洗效果，就算絲絨、羽絨都一樣洗得，連乾洗錢都慳埋。
單睇半透明嘅綠色機頂蓋襯上米色機身，已相當吸引，講到內涵則更厲害，除咗快思邏輯、完成洗衣響鬧呢啲基本功能外，更採用雙旋轉葉輪，可以分別產生垂直同水平嘅水流，既可增強清洗效能，又可減少扭動帶嚟嘅衣物損害。再加埋原創嘅無孔洗衣槽，能避免乾衣時對衣物嘅擠壓，對衣物呵護備至。
型號：聲寶ES-F650
洗衣量：4.5公斤
乾衣速度：900轉
體積：W565×H905×D541mm
售價：約$2,180（各大電器行）
型號：聲寶ES-S750
洗衣量：5公斤
乾衣速度：900轉
體積：W565×H905×D541mm
售價：約$2,280（各大電器行）
嫌ES-F650的洗衣量唔夠多的話，聲寶還推出了大容量嘅半透明紫色機頂蓋機款，鍾情紫色的朋友不妨諗諗！
傳統有孔洗衣槽，令衣物喺乾衣操作時被擠壓至槽孔，造成損害。但無孔洗衣槽設計就可以省卻擠壓問題，令衣物保持最佳狀態！
如果你嫌白色，以至Colourful嘅顏色都唔夠貴氣的話，呢部韓國機採用金光閃閃嘅黃金色機殼，就絕對氣派十足，極之搶眼。咪睇小韓國產品，呢部機嘅機頂蓋以透明設計，抵讚嘅係快思邏輯電腦能利用瀑布式同旋渦式嘅水流，令洗衣更乾淨之餘，亦可保護衣物質料。
型號：三星WA85K2SP
洗衣量：6.5公斤
乾衣速度：無註明轉速
體積：W540×H850×D560mm
售價：$2,180（華仁會）
唔單止金色機身夠晒閃，連機內洗衣槽亦都閃到爆燈。質料採用不銹鋼製造，夠晒耐用，比起部份日本牌子仍採用塑膠洗衣槽更加高級。
如果你用開歐洲機，有冇試過開洗衣機桶門時，畀佢「拍」一聲彈開嚇親。為咗解決呢個問題，呢部歐洲上置滾桶式新款洗衣機，就首創輕柔式油壓桶門設計，只需一指輕按，桶門就會慢慢打開，又靜又安全。佢更獨有桶門還原裝置，洗完衫後，毋須用手翻動滾桶，夠晒方便。
型號：T633
洗衣量：5公斤
乾衣速度：650轉
體積：W400×H850×D600mm
售價：約$3,898（各大電器行）
金章專利發明嘅碳纖維洗衣機底盤及外桶，出咗名夠晒耐用兼隔音好，𠵱家加埋油壓式避震嘅設計，能將機身震動以及噪音減到最低，絕對唔會將睡夢中嘅你「轟」醒。
外形似足日本至Hit嘅「快速銀河」系列，奶白色機身襯埋湖水藍嘅半透明機頂蓋，外形夠晒討好。功能上，至抵讚係備有1-12小時預校時間掣，洗衣機會喺選定時間內自動完成整個洗衣過程，自動熄機，瞓醒或者放工後就可以晾衫啦！
型號：東芝AW-9000SH
洗衣量：7.5公斤
乾衣速度：900轉
體積：W600×H986×D564mm
售價：約$3,480（各大電器行）
呢部機備有精算水位同花灑式沖洗系統2大功能，可根據衣物數量適當入水；而花灑式沖洗系統亦能以最少水洗淨衣物。
售賣點
日立（查詢電話：27700377）
金章（查詢電話：22621620）
華仁會電器（23980280）旺角花園街75-77號花園商業大廈5樓
東芝（查詢電話：29560222）
聲寶（查詢電話：28229435）