人生七十古來稀，「外國記者會」嘅創始人AnthonyLawrence（安東尼．羅蘭士），噚日九十大壽，重非常精靈，行得走得，講笑話重得。
六十年代已經來港嘅Anthony，大家都會暱稱佢為Tony，當時受僱於BBC（英國廣播公司），任遠東特派記者，非常有社會正義感。𠵱家仍然為人津津樂道嘅就係，當年佢堅持越南難民營嘅小朋友都應該有權接受教育。
咁老資歷嘅記者，唔怪得連特首董建華都要畀面出席佢嘅生日會，重有律政司司長梁愛詩、社署署長林鄭月娥、廉政專員李少光等亦趕來捧場。九十歲嘅Tony在致辭時連特首都照開玩笑，一面話大家都知記者最麻煩，樣樣都要加把嘴，特首都唔嫌棄，來賀佢呢個……
講到呢到，Tony忽然話鋒一轉，話唔想踩得自己太低，唔會將個形容詞講出口，惹來哄堂大笑。特首祝酒時，話如果計精神上嘅富足程度，Tony肯定係最富有嘅人，希望十年後來幫佢慶祝百歲生日。
﹙圖﹚特首舉杯祝賀外國記者會創立人安東尼．羅蘭士九十大壽。
傳真︰2623-9278
電郵︰