政府公佈六月份零售總值大跌，並不令人意外，但其中有一項銷售額上升嘅，就係超級市場用品。超級市場賣最多嘅係乜嘢？當然係飲料食物啦，香港人窮窮哋，買嘢返屋企煮飯或者煮麵，一定慳過去酒樓餐廳。
正因如此，六月份世界盃期間，冇電視轉播足球嘅餐飲場所，生意大跌；到咗七月，一節淡三墟，差不多所有餐飲場所，不論中西，都出現營業額萎縮嘅情況，業界人物無不喊苦連天，淨係睇「麥當勞」喺一個月之內，用二千萬廣告費推介「二、三、四」（雪糕、蘋果批、漢堡包），就知道市道不景啦，要賣幾多份「二、三、四」先至攞得番二千萬大元廣告費呀？
雖然係咁，太古廣場內一間最老字號（太古廣場開幕嗰日佢就開張），最近租約到期，仍然面臨加租之苦。老字號以前生意鼎盛，客似雲來，但呢兩年大不如前，以為可以傾吓減租，點知業主話：「大把人等緊你個舖位。」業主堅持逆市加租，皆因個場旺，有人鍾意，本着為股東謀利益嘅立場，你交唔起新租，關我乜事。
太古廣場冇錯係人頭湧湧，但最平價嘅foodcourt嘅生意額都似跌多過似升，一間大店透露，與去年同期比較，營業額嘅跌幅，係雙位數字，皆因人頭雖多，啲人食少咗，食平嘢多。外間啲人唔知，以為好好景，故此肯畀現時租金更貴嘅租，係要打入去霸位，業主唔加租就笨咯！