特首董建華嘅家族靠船務生意起家，係人都知。不過時至今日，董家成員已經由海路攻上天空。話說董建華個仔董立均，舊年十月加入港龍航空出任市場推廣及營業總經理一職之後，唔夠一年，董建華個細佬、東方海外集團主席董建成﹙圖﹚，又被國泰航空委任做董事，九月一日生效。
香港得國泰同港龍兩間航空公司，董建華個仔同個細佬，各據其一，都咪話唔係董家「天」下嘞。
梗係啦，國泰同港龍都昅實中國嘅航空市場，國泰重話咗想開辦內地航線。董家同中國政府關係咁好，人脈關係嘅覆蓋範圍廣闊，國泰呢次委任，重唔係為攻入內地鋪路？話時話，除咗董建成之外，國泰噚日重宣布委任地鐵主席蘇澤光做董事，一樣係九月一日生效。
傳真︰2623-9278
電郵︰