卓能（集團）委託鴻運地產拍賣十一項物業，當中九項係大嶼山梅窩卓濤軒單位，本周五拍賣。鴻運蔡漢陞透露，剛售出一個卓濤軒單位，成交價四十萬，每呎一千蚊有找，只要806蚊。
呢個一座一樓D室連平台單位，面積496方呎，平台340方呎，原本拍賣開價三十七萬，喺拍賣前以四十萬售出，比開價僅高8.1%。從呢單成交睇，業主都幾想出貨，有意嘅買家可以此作參考價，唔使受現場氣氛影響而高價入貨。
蔡生話，買家係區內原居民，睇見廣告就嚟問，單位用作自住。
卓濤軒樓齡六年，地皮係趙世曾做主席嘅卓能，92年11月喺政府賣地場以四千五百萬購入，樓面呎價1286蚊，𠵱家只係賣得806蚊一呎，連本都收唔番。
十年前買入地皮起樓，現時都要蝕一大筆，做地產都唔係實賺㗎！
經濟不景，各行各業都大歎生意難做，以前一般人認為好搵嘅銀行同律師樓，都風光不再。但美聯商業部助理總經理黃漢成透露，最近有一家律師行竟逆市擴充，以呎租十六蚊，承租金鐘力寶中心二座507室，單位面積1162方呎，每月要18592蚊租，免租期只得半個月，比正常為短。原來呢間律師行現租用上址505至06室二千幾呎，租埋07室就好用好多。
聽講呢間律師樓有做破產官司，睇到本港破產同勞工索償案急升，所以擴充寫字樓，迎接商機，咁啱隔籬單位丟空，因利成便租埋嚟用。
本港公司擴充本來係好消息，但若果業務係同破產有關，就未免令人心酸。
樓宇買賣銀碼點都比租盤大，代理好自然會傾向做佣金較多的賣盤，大業主惟有加錢利誘經紀，落力sell租盤。蘭西聽聞，有發展商旗下豪宅盤，代理促成租務交易，除可得到一個月租金做佣金，重會有獎金，幾多？三萬蚊囉。以一個豪宅單位月租十萬計，代理同公司拆帳收25%，即兩萬五，加埋獎金就有五萬幾，都幾和味，一個月做到一單就夠皮嘞。
正當全城視線集中在馬灣珀麗灣身上，部份地產代理仍繼續於二手市場奮戰，好似香港置業剛促成嘅馬鞍山新港城H座高層4室，就搞咗一大輪先至做得成買賣。
買賣雙方噚日都要出門，代理惟有喺之前一晚同雙方議價，一直傾到深夜都埋唔到欄，諗住冇行。個經紀噚日一早七點鐘盡人事再試多次，結果業主同意以二百三十萬成交。以單位面積749方呎計，每呎都要3071蚊，但業主就蝕四十八萬。代理馬拉松式議價，磨爛蓆手法，都幾收效㗎。喺𠵱家咁嘅市，經紀都好珍惜每一個機會，就算做通頂亦冇計。
蘭西家中信箱日前收到隻VCD，原來係番禺名苑別墅嘅宣傳品，印象中好似未見過有發展商用呢種手法。
據樓盤代理福達行發言人麥生表示，佢哋之前都用過呢招，不過規模就以今次最大，總共派咗八萬隻，每隻成本一至二蚊，連埋郵費都係三蚊，唔算貴。
麥生話雖然十個人收到八個都可能順手掉咗佢，但只要有兩個肯睇，就已經收效，暫時反應都唔錯。佢重透露，一啲之前打過電話查詢同留低地址嘅客，今次重會額外收到一本樓書㖭。
參加該盤的考察團，可以享有優惠價，只要二百蚊，包來回船票、專車接送同午餐。自己買船票去番禺蓮花山，單程都要一百五十一蚊，坐直通巴士就八十至一百蚊。麥生話公司每個星期三同日都有考察團。佢透露，客戶之間有時會將各地樓盤做比較，間接為屋苑做埋宣傳。
蘭西
電郵地址：