謝霆鋒昨日正式宣布暫別娛樂圈，並暫定下月初離開香港，不過他強調不會放棄自己和樂壇。對於他駕車發生的意外，他表示會一人做事一人當，做錯事會認，更揚言不怕入獄，只擔心因此為家人和唱片公司同事帶來麻煩。
謝霆鋒昨日在灣仔英皇集團中心舉行記者會，正式交代他暫別樂壇的事宜，英皇的高層包括吳雨及霍紋希等均有出席，而不少霆鋒的歌迷亦到場聲援，更寫下祝福語句。
穿上黑色恤衫的霆鋒甫坐下便說：「多謝晒各位星期日放假都嚟。我有幾點想講，第一，我係會暫別樂壇一段時間，唔知幾耐，但我會好圓滿盡力做完手頭上嘅工作，九月頭先會正式離開香港；第二，我絕對唔係放棄樂壇，放棄我自己，亦唔係逃避意料之外不愉快嘅事，我只係想有個成熟同滿足到大家嘅謝霆鋒返嚟，同時希望全球華人嘅媒體及歌迷同我一齊成長，因為香港太多負面新聞。」
霆鋒續道：「好多人問我暫別樂壇怕唔怕影響日後嘅發展，我嘅發展係一件好小事，或者大吉利是死咗，都冇人會記得！我記得今年嘅新年願望係一切宣傳注意力集中番喺我音樂上，但係我徹底失敗，大家只係留意我同邊個拍拖。我嘅原則係不進則退，我唔知幾時返，唔知道會唔會返，亦唔知有冇人叫我返！」說到此時，霆鋒更眼泛淚光。
問霆鋒今次暫別是否因為近日官司纏身？霆鋒說：「我走唔係逃避任何嘢，上次台灣我都可以唔使去，但我親自去係要還我一個清白，絕對唔係怕（入獄）。我𠵱家觸摸唔到我嘅靈感，我作唔到歌。一人做事一人當，有錯我一定會認。」問霆鋒怕不怕入獄？他說：「唔可以用個驚字，我係擔心惹麻煩畀公司同家人。」
霆鋒亦乘機向早前交通意外受傷的律師道歉，他說：「揸快車唔係得我一個，算命都講過車係我剋星，但我好愛呢樣嘢，有機會我想講嘅，係某宗交通意外，郭生（受傷律師），唔好意思，嗰日我唔係揸快車，我係兩日通宵寫歌所以瞌眼瞓。」
不過霆鋒透露在暫別期間，有可能會再出現，因為他有多個廣告的宣傳工作要做，而霍紋希亦說：「如果有廣告商個別要求，我哋都會履行。」
問霆鋒會否在這段時間與王菲環遊世界，他即大笑否認，到記者會完畢前，霆鋒還送上忠告，他說：「好多人以為謝霆鋒咁細個出嚟好似成就好好，好多年輕人唔讀書想做歌手，讀多幾年書先啦！娛樂圈表面風光，出咗嚟做嘢就冇得返轉頭。」
採訪：胡比 攝影：林德雄