明晚美國聯儲局議息，相信港股呢兩日都係牛皮悶局居多，如果冇心水，最好高掛免戰牌，就算手癢難耐，都係細細注好嘞。
睇走勢，無論美股或港股，都升抵關鍵阻力位附近，後市可以大升，亦可急跌，視乎突破阻力還是受阻而回。𠵱家買輪，站對邊自然會贏到笑，站錯邊則好易輸到喊。
較穩陣嘅做法，係等恒指突破10300至10400阻力追揸Call輪，跌穿9900則買Put輪。想博啲𠵱家就入市，注碼只宜小，並切記止蝕。
近幾日美股炒上，藉口係憧憬聯儲局減息。明晚議息結果如何好難估，如果唔減息，美股可能趁機調整，但即使減，若幅度只為1/4厘，市場應已反映，況且減息係好事定係壞事，實在有排拗。從呢個角度嚟睇，短期後市向淡機會稍大。
睇淡後市可向滙豐Put輪埋手，因正股（005）仍企於相對高水平，向下空間唔細。近排市況不明，窩輪普遍縮溢價，故此現在收集滙豐Put輪，宜取溢價同槓桿率較低者，對象係9366，現價0.78元，玩到年尾，溢價7.1%，槓桿率11.4倍。
章 盛