前日最𢱑頭嘅波，梗係英甲強隊米禾爾竟然主場淨吞下游分子洛達咸六蛋，聽佢哋嘅領隊麥基話係班球員因不滿凍薪，所以先至踢成咁。
ITV冧咗，搞到好多英甲球會喺財政上出現問題，而米禾爾亦唔例外，要凍結球員人工；連麥基都唔認為係技不如人，只不過係球員唔盡力。麥基咁樣話：「我好質疑點解啲球員踢成咁。如果佢哋覺得經已盡晒力，咁樣睇我哋應該要換血！」其實米禾爾班球員經已好幸運，只係凍薪而唔使減人工；所以如果個別球員真係好似麥基咁講特登玩嘢累球隊輸波，真係抵炒魷。
另外，由於啲超聯球會冇錢買人，所以三支超聯降班隊葉士域治、打比郡同李斯特城，都幾乎可以原班人馬比賽。佢哋有超聯球員壓陣，喺英甲超晒班，演出亦對辦，下屆應該好有機會返超聯。
讀者或者會問德甲都開番，但係點解連一張比賽相都冇。事關德甲聯賽會要各通訊社簽下同意書，唔可以將啲比賽相用喺其他刊物同互聯網度；不過，啲通訊社唔制，所以咪冇得入場影囉。話晒呢個世界有資訊自由，所以德甲聯賽會咁做，真係好唔合理。
新一季英超未展開，但最受壓嘅領隊一定係新特蘭嘅列特，皆因新特蘭唔單止買唔到好球員，熱身賽表現又差，搞到新特蘭球迷向列特潑啤酒。可能佢當時個慘樣太深入民心，喺BBC搞嘅一個蠟筆畫比賽中，一個參賽者就畫列特當時個樣參賽，重贏埋㖭！相信列特自己睇番都覺眼冤。
我求大俠知道愛華頓除咗簽「雙李」之外，季前亦有另一新搞作，就係安排教練同部份球員唱歌出細碟，慶祝球會第一百年喺頂級聯賽角逐，重話希望喺三日發售限期賣到超過五千張，咁就可以打破以前阿仙奴隻細碟嘅銷量紀錄。大家都知道以愛華頓嘅實力贏阿仙奴唔易，所以惟有喺另一方面發展，攞番個彩啦！