特首新班子身家大晒冷，最搞笑其實係「樓王之王」教統局局長李國章，呢位在全球各地擁有七十多個物業嘅大業主，由校長轉做局長之後，竟然話無地方住，要在中大校長宿舍「漢園」暫時寄居。
好在中大非常體諒呢位前校長，橫掂有排未有新校長上任，樂得做個順水人情，畀李國章一個寬限，唔使佢咁快搬。話雖如此，Arthur（李之洋名）畢竟要避嫌，而且由新界出中環都好費時失事，反正遲早要走，都係早搬早着。
Arthur嘅要求不出以下幾個：一要近中區，咁中半山及山頂樓最啱。二要夠闊落，佢咁鍾意舊家具，連中大校長辦公室嘅家具都要搬去「部長樓」，如果新屋要裝得落佢由超豪複式「校長別墅」搬嚟嘅家具，細過三千呎都唔掂。三要容許養狗，Arthur咁念舊，養開嗰三隻狗點捨得分開。
八方日前問過地產界老友，佢話現時又抵租又抵買，Arthur如果考慮獨立屋，山頂施勳道4號嘅倚雲山莊10號屋，3000呎叫價3500萬，可以望到煲呔官邸。重有一個筍盤就係山頂柯士甸道豐林閣，3200呎叫價3200萬。另外，聽講馬時亨、葉劉淑儀住緊嘅澄碧閣亦有單位放盤，如果校長搬埋去，就真係名副其實嘅部長大廈喇。
傳真︰2623-9278
電郵︰