八月份會考放榜，高考聯招（JUPAS）宣佈正式遴選結果，當然係有人歡喜有人愁。講番一句老話，成績優異者，恭喜晒；成績平凡者，不要氣餒，請繼續努力，行行出狀元，香港啲白手興家大富豪冇乜邊個讀過大學，甚或讀完中學，但好多個富豪有學識噃，點解呢，因為佢哋幾十年來不斷自修也。
上個月一位讀者Annie問：高考成績普通，報讀咗廣州暨南大學，好唔好？英文點搞？
左丁山對中國大學認識不足，睇番龐愛蘭寫嘅新書《成功升讀中國高校指南》──赴中國升學必讀，裏面有一章講「中國大學一百強簡介」，暨南大學排第六十八位。讀暨南大學，香港公司會否承認，好難講，間間政策都唔同，即使今年唔承認，幾年後又是一番光景，Annie唔使理咁多。至於英文囉喎，最緊要盡量在暨南爭取修讀英文嘅機會，然後考一個IELTS（即係大學教育資助委員會推薦畀本地大學生考嘅英文水平評核試，可向英國文化協會查詢），得到好成績嘅話，自然冇僱主懷疑你在內地大學畢業，英文唔掂。
如果會考高考之後，想去外國浸一浸，再入大學，可考慮社區學院。電腦J一位老友即將出版一本《美國社區學院全攻略》，搵咗左丁山做顧問，本書介紹美國社區學院，直擊訪問幾間學校，包括Foothill，有參考價值，出版後，大家可以睇吓。