身體過肥問題，喺富裕國家響起警號，賣減肥藥、健身產品及搞健身中心，變成賺大錢行業。健身中心喺香港已十分普遍，估唔到呢股健身熱潮吹到內地。蘭西最近收到戴德梁行一份北京商舖報告，劈頭就話健身中心已經成為商場嘅主要租客。十大主要租務個案，頭兩位就係由健身中心承租。好似成銘大廈，有近五萬四方呎由寶迪沃（BodyWorks）租咗；陽光廣場三萬二呎租客係思姘麗（Decleor）。北京果真好追得上世界潮流。
北京除咗健身熱之外，亦興食廣東菜，廣東菜館如雨後春筍一間接一間咁開，第日去北京旅行，真係唔怕食唔慣嘞。
戴德梁行指出，最新興行業係搞高檔電影城，除新東安市場嘅寰宇電影城之外，東方廣場亦計劃搞中外合資嘅新世紀電影中心；王府井金寶街又會同比利時集團合作，興建全數碼化嘅國際影視城。