長實趙國雄早前賣紅磡海名軒，請內地富豪南下睇樓，令佢喺內地廣為人識，上海浦東市政府來港搞樓盤展銷，都要請佢做嘉賓。
佢日前以嘉賓身份，主持展銷會開幕禮時，被記者發覺佢嘅「刨冬瓜」（普通話）果然頂呱呱!!!佢重好得戚咁話，為咗就香港啲老記，要講廣東話喎。卒之佢只喺開頭及收尾講幾句「刨冬瓜」，中間一大段用返廣東話。
趙生噚日又出現紅磡泓景臺二期示範單位，向記者講講樓盤情況，期間一位坐在售樓處正向職員查詢嘅婆婆，望見趙生行過，突然講咗一句「趙生好靚仔」，趙國雄聽到之後即企定定，回頭一望，見阿婆起身，就走埋去同佢握手，又派卡片。事後趙生好開心咁話，從未試過喺呢啲場合俾人讚靚仔，所以講多啲嘢。
趙生又為佢嘅「截胡價」辯護，強調目的想引人注意個盤，截唔截到胡都唔係問題，重話係讀市場學時學到嘅嘢。