新地馬灣珀麗灣連續兩日內購之後，噚日休戰，示範單位照常開放，地產代理就無得抖，繼續拉客落島睇樓，為下一次開售做準備。
有代理向蘭西報料，話下晝兩點幾，突然見到附近有一大班人湧到，打探後先知原來係郭二少（炳江）到場巡視，雷霆同周國賢等人陪同左右，隨時準備要答老細問題。搞到部份睇樓市民都好奇地問「佢係邊個？」。
噚日珀麗灣處處見人龍，但最多人排嘅就係攞小食呢條隊，梗係啦，個島咁大，行完都又攰又餓，唯一有嘢食就係發展商安排嘅攤位。
另外，有一處地方都好多人，就係新地會嘅攤位，點解啲人咁有興趣，突然間爭住要入會？原來發展商話噚日入會都可以參加「會員置業有禮計劃」抽籤，抽到買珀麗灣可以減樓價3%。珀麗灣今日有50個單位留畀新地會員內購，揀樓地點會移師到葵芳新都會廣場。
另外，市傳珀麗灣噚日出現代理打交事件，但好快就平息咗。假如搞到俾發展商停牌就真係大件事嘞。和氣生財呢句話幾時都啱用。