朱茵噚日喺元朗為「寶寶夏日寵物鬥一番2002」擔任嘉賓評判，現場有各類寵物如貓、狗、兔仔、葵鼠等。朱茵見到葵鼠咁可愛，重攞上手玩，而當佢見到兩隻狗仔當眾做出不文動作時，竟然開心到大笑。
朱茵對於男友黃貫中（阿Paul）因為開快車扣晒分，被罰停牌三個月，朱茵笑住咁話平時香車載美人，暫時就美人載男友，𠵱家香港交通發達，出入都唔係大問題，佢話：「咁咪重安全，起碼唔使驚俾人偷車。」本來阿Paul上庭嗰日，朱茵想陪男友一齊去，不過阿Paul話唔使陪，只係精神上支持佢就得喎！
盧巧音（Candy）噚日喺柴灣新翠商場，出席「新地夏日沖天海陸空2002」活動。
對於蘇永康喺戒毒期間重要唱歌表演，Candy話自己都有睇到報紙，佢覺得康仔好似精神咗。Candy重話康仔係佢嘅學習對象，因為佢咁有勇氣去面對呢件事。
譚詠麟（阿倫）本月二十三號就五十二歲牛一，噚日佢喺黃埔同五百位歌迷預祝生日，阿倫打扮得好型仔，染咗一頭紅髮，重着咗件龍鳳衫，佢自己都笑話：「我呢個係『紅運啄頭』，龍飛鳳舞look。」阿倫嘅歌迷好熱情，活動一開始就跑晒去台前同偶像大合唱。
江美儀男友張煒前日四十歲生日，佢哋前晚喺中環慶祝。問張煒幾時迎娶江美儀？佢話：「我未想結婚住。」
問張煒覺得女友值幾多分？佢話：「七分啦，因為佢唔夠溫柔，廚藝又差。」江美儀就話：「佢肯娶我，我可以為佢做一切嘅嘢。」
任葆琳前晚喺銅鑼灣出席派對，問佢慧妍雅集因陳法蓉同梁佩瑚開會時發生意見一事，佢話：「我唔係慧妍嘅成員，所以件事我都唔係好清楚，我唔加入慧妍，因為我覺得自己並唔係一個有代表性嘅港姐，而且我份人好男仔頭，唔鍾意埋女仔堆。」
台灣天后張惠妹（阿妹）噚日喺台灣為新唱片做宣傳，現場吸引咗成幾百位歌迷捧場，附近嘅道路都擠得水洩不通。歌迷為阿妹補祝三十歲生日，重送上生日蛋糕。阿妹除咗舉行簽名會外，重同舞蹈員喺台上大跳貼身舞。噚日可能天氣太熱，活動中有歌迷中暑。
陳綺貞噚日喺德福商場為新碟舉行簽名會，佢即場自彈自唱咗三首歌，佢隻新碟喺台灣銷量排第二位，僅次於周杰倫。陳綺貞話：「很高興，因為我出碟才一星期，我也喜歡周杰倫的歌，他之前兩張專輯我都有買，但新專輯我還沒有時間去買。」
李克勤之前做世界盃節目，同林敏驄玩得太癲，搞到陳伶俐唔開心。噚日克勤同林敏驄去譚詠麟（阿倫）嘅生日會，由阿倫做「和事老」，叫克勤同阿驄和好，但克勤話：「唔關阿驄事，係佢老婆啫！」之後重叫阿驄個囝囝錫自己，但伶俐大合照都只係企埋一邊。