今次自己得到最有價值球員獎項（MVP）當然開心，不過，我認為呢個獎唔單止係自己嘅功勞，同時亦係全隊球員努力嘅成果。
其實，總結自己喺今屆工商盃嘅表現，如果十分為滿分，我只會畀自己七分。今次工商盃教練達凌安排我打小前鋒，雖然呢個位置我喺甲一聯賽都有打過，但係同菲律賓或泰國嘅小前鋒交手後，發覺自己嘅速度仍然唔夠快，而力量亦有待改善；所以喺今個暑假，我會盡量抽時間去健身室鍛煉體能，保持最佳狀迎接新球季。
講到新球季，其實自己都未決定暑假後選擇去外國讀書、定係加入全職業嘅CBA聯賽。屋企人當然希望我以學業為重，不過我就想先試試職業球員滋味，然後再繼續讀書。
今次呢個人生交叉點，自己真係要慎重考慮，估計到八月尾時我會有所決定，到時一有消息，我一定第一時間通知大家。多謝大家咁多日嚟嘅支持，後會有期！
香港籃球隊代表譚偉洋