歐偉倫，香港足球圈無人不識。
除了他是香港近年最出色華人前鋒外，當然還有他愛蒲夜店，蒲到差點飯碗不保，以及公然拒絕由利沙雲執教的港隊出戰世界盃外圍賽等等。
歐偉倫說，看到球市無止境地下沉，實在很心淡，再沒有甚麼好留戀，但為生計惟有續在球圈打滾，相信踢多一兩季便收山，另闖新天地。
但他無悔選擇以球員作為職業，因為足球是他的興趣，過程中帶給他無限歡樂；「最衰踢波唔可能踢一世，如果得，我一定踢下去。」歐偉倫說。
問 ：球市不景，球會再次減薪，你有否感到心灰意冷？
歐 ：坦白講，踢波只為錢，踢得曳減薪，我無話可說，但踢得好，又減，好灰。上季搏到盡為球隊爭取成績，但咁又點，都係要減薪，你說我今季應該以乜嘢心態踢好。
問 ：你覺得香港足球搞到如此田地，哪方面要負上責任？
歐 ：香港足球有好多問題，體院解散足球部是其中一個因素。而電視台不停直播歐洲各地高水平聯賽；而本地波水平不高，踢來踢去都係嗰幾隊，球迷自然冇興趣再畀錢睇。球員之間競爭又唔大，我落場踢有時都覺得冇癮。
生活篇蒲夜店與球會交惡
問 ：過去有傳聞，話你經常通宵去蒲去玩，這是否屬實？
歐 ：後生仔邊個唔玩，初加盟南華因為住宿舍，冇人管住，好自由，夜晚經常去蒲，故影響到練波嘅表現。當年南華疑因我嘅紀律問題唔同我續約；到最後又留番我，實在好多謝南華同Peter畀機會，而我嘅表現亦冇令球會失望。講真，經過呢次事件，我完全將去蒲去玩與練波同比賽分開，加埋有女朋友管住，清楚知道邊個時候至可以玩。
問 ：很多教練都說，以你的質素絕對可以衝出亞洲，但你就欠了點上進心，是否同意？
歐 ：我在九六至九七嗰年球季膺足球先生後，教練黃文偉曾經同我講過是時候出外落班。其實我都想出外搵食，起碼搵到錢，但香港球員就係冇乜呢方面嘅渠道，就算想都冇專人安排。
問 ：你就快三十一歲，話會踢多幾年，之後有甚麼打算？
歐 ：球市咁差，都好心淡，最多踢多一兩年就會退出球圈；而我對教波完全冇興趣，所以唔會留喺球圈。反而有興趣做生意，想試吓同朋友開酒吧，睇吓有冇好的出路同前景。
出生日期：14/08/71（30歲）
身高：1米80
體重：75公斤
位置：前鋒
現效力球會：南華
曾效力球會：海蜂、保濟、東方、依波路
個人榮譽：香港足球先生(97年)、最佳足球明星、香港隊、港聯
圖/文：曾雁平
部份圖片由歐偉倫提供