民政事務局局長何志平當日唔肯公開保證唔會「秋後算帳」，事後佢解釋話係對事不對人，但何局長出名「好記性」，邊會咁易當冇事發生，果然八月八日立秋之後，文化界已經流傳何局長開始「算帳」，首當其衝就係文化委員會主席張信剛。
文化界流傳何局長上場後，區議會、青年事務委員會等大諮詢委員會主席都見過，惟獨係冇單對單約過張校長。文化界老友話，係人都知當年何局長一心想做文委會主席，雖然董特首知人善任，搵個更「正」的藝術發展局主席畀過何局長做，但呢件事何局長始終係放唔低，後來藝展局同文委會爭話事權，就更加唔使講，所以何局長唔見張校長，真係唔奇。八方向一些文委會成員求證，據佢哋所知，何局長有約過食早餐，但好似冇約過張校長喎！怕且何局長今次都要澄清吓！
傳真︰2623-9278
電郵︰