新菜牌：
法國季節料理　蔬果海鮮做主角

鵝肝、生蠔、魚子醬就似是法國菜的象徵，但若然真的要數法國菜款式，又何止寥寥數款？其實法國菜都會有季節料理，就夏天來說，各式當造蔬果加上生猛海鮮，都可以做出各式各樣冷熱、清新、香濃不同的效果，今個夏季一於以這些夏日新元素做主角，等大廚炮製出一系列不再傳統的夏日法國菜。

記者：黃婉冰　攝影：陳偉強　
ImageGirl：Christy

煎龍蝦配芒果大麥蛋白汁
龍蝦與芒果向來是無敵配搭，但原來啤酒味與龍蝦同樣天衣無縫，所以大廚索性用希臘濃味啤酒和蛋白做汁，將兩樣配料打至起泡，再加入雞湯、魚湯就成了這個泡泡汁。龍蝦先煎再鋪上芒果肉輕輕一焗，讓芒果香滲入蝦肉，用輕飄飄的大麥蛋白汁配肉質爽口的龍蝦，一輕一重的口感，是這道菜的微妙之處。

Christy試味： 「龍蝦肉好新鮮，好鮮甜，蛋白汁好似忌廉咁滑，龍蝦肉咁鮮味最好就咁食，而芒果蘸汁食就最好味。」

烙法國鵝肝配炒田雞腿
椰菜汁及葡萄酒汁 大廚推介
這款是神秘主菜ImaginationbyChef，今次的神秘嘉賓是鵝肝配法國田雞腿，這些田雞腿比本地的貴20倍，全因獨有的嫩滑肉地，即使炸過再用蒜茸、乾葱、香料、橄欖油炒過，肉質依然香滑，這種法國鵝肝油份極低，以加入橙皮的炒菠菜伴之，再配以用當造椰菜花打茸加忌廉打成的椰菜汁和牛仔肉紅酒汁，以甜味帶出鵝肝的香味。

試味報告： 田雞腿外表蘸滿各種香料，惹味鮮嫩，椰菜汁入口似一陣風，與紅酒汁一濃一啖的配搭，一絕。

Angus： 「客人叫呢道菜都會送一杯白酒作配襯，配合法國田雞食，可以令鵝肝無咁單調，而且當地田雞較本地衞生，食客可以食得更加放心。」

青瓜冰鎮鮮蝦包配呍呢拿黃豆醬
底層的青瓜冰並非普通沙冰，是大廚用青瓜榨汁，連肉加冰製成，再加入薄荷葉做出冰涼效果。冰上的雲吞是蛋白pancake皮包蝦肉做成，蝦肉選用法國淡水蝦，起肉用伏特加酒浸過至入味，以刺身形式做雲吞餡，淋上呍呢拿加高級濃味豉油做的汁，做到一碟有齊清、鮮、甜三種味道。

試味報告： 新鮮生蝦肉鮮甜中滲着點點酒香，有種涼浸浸的感覺，跟青瓜冰同食，清涼感加倍，切記要即時食，才能保持冰凍口感。

脆神戶牛肉配釀葡萄葉紅酒汁 記者推介
餐廳所用的神戶牛柳是美國運返的混種神戶牛肉，無論肉地與質素同日本的一樣，油花同樣均勻，選用西冷部份，加少許胡椒吊味，以溫度剛好的油炸至半生熟，撒上適量海鹽作口感上的點綴，旁邊比「珍珠雞」還小的是葡萄葉包野米飯，薯仔來自緬甸山區，絕不簡單。濃汁用牛肉的頭、尾加紅酒煮成，令整道菜充滿肉香。

試味報告： 炸的神戶牛肉食法較新穎，炸過後肉味香濃、肉質腍滑，肉汁依然，野米飯連同葡萄葉同食，葡萄葉有種涼涼的感覺，味道清新有特色。

開心果仁及柑橘特色
柑橘是指柑、橙、西柚等生果，將三種甜度有別的生果一同放在千層酥上，千層酥每層中間又夾有香脆開心果碎、朱古力忌廉，增添口感，另一邊是重蛋味的開心果雪糕，成份以焦糖、開心果及蛋黃為主，全是自家製作。

試味報告： 千層酥鬆化得有入口即溶的感覺，生果有甜有苦，各有特色，雪糕幼滑中帶開心果的香脆，整體來說不太甜。

凍熱芝士梳乎里配雜莓
冰火梳乎里，冰的是用淡味芝士、蛋黃、忌廉、生果醬混合雪凍製成，而熱的則用蛋白芝士、糖等打至起泡焗製，撒上糖霜，為梳乎里加上點點甜味。在炎炎夏日，凍的梳乎里就理所當然地成為整碟的焦點所在！

Norris試味： 「熱嘅梳乎里焗得好香滑，入口即溶，唔會好甜，而凍嘅感覺完全唔同，冰凍得來有少少似食雪糕，感覺同熱嘅完全唔一樣。」

Teca夏日清新法國菜
龍蝦雲吞配魚子醬海膽汁
鵝肝醬配無花果脆層叠蟹黃汁
＊煎龍蝦配芒果大麥蛋白汁
炒環球蘑菇配松露紫茨及椰菜花茸
＊脆神戶牛肉配釀葡萄葉紅酒汁
＊凍熱芝士梳乎里配雜莓
開心果仁及柑橘特色
蛋白球配香芒汁
＊推介菜式

店名：Teca
電話：28336083
地址：跑馬地成和道45號(滙豐銀行側)
座位：80個
營業時間：星期一至六中午12時至下午2時半，晚上7時至11時，星期日上午11時半至下午3時，晚上7時至11時。酒廊逢星期五及六晚上10時至凌晨2時。
付款方法：現金及信用卡(Visa,Master,AE,Diners,JCB)
備註：Gourmetsurprisemenu共六道菜，每位$680，客人可在餐牌中選擇頭盤、主菜及甜品，餐前小點、餐湯及另一道主菜則由大廚決定菜式。