想在內地創業，也未必要自己一手一腳開創，找到適合的公司，一樣可以注資合作，就好像Orange先生，幾經轉折，終於找到理想的學院投資。他只需向學院租用牌照和班房，便可一展作育英才的抱負；加上看準中國入世貿後，內地人學英語的熱潮，相信此時辦學必有作為。
記者：羅蘭 攝影：CarlZeiss
廣東啟源律師事務所熊律師謂以前的教育機構，全都由國家控制，根本無可能由私人營辦，只是近幾年內地政策開放，才小量發牌給有能力的機構辦學，審批亦相當嚴格。每間學校除了要有辦學許可證外，還要取得消防、衞生等基本牌照，而香港人則幾乎無可能獲發牌。
「香港人投資在內地有辦學證嘅學校，如果有合約制衡，基本上問題不大，但最緊要係合約條文清楚規定雙方要履行嘅權利同義務，最好當然係有律師幫忙制訂合約，以免日後出現問題。」
在香港某大學持續教育學院做過導師的Orange，自言對教育充滿濃厚興趣，但因香港經濟環境太差，要辦學校，倒不如去深圳。
「不過到內地搞學校，最難係搵地方同攞牌照，由於管得好嚴，就連內地人都好難攞。起初我都想跟個朋友搞幼兒園，重喺布吉搵到一個內地拍檔㖭，點知佢話要用300萬起學校，雖然話包埋所有牌照，但價錢實在太貴，最後就不了了之。」
不過，皇天不負有心人，今年Orange終於跟香港拍檔Jacky找到現在的振西學院，以投資形式作業。「原本Jacky都唔想搞學校，但今年年頭佢又話中國入世貿，會有好多內地人去學英文；加上佢喺內地又有人事關係，結果俾佢搵到𠵱家呢間振西學院，還一拍即合。」
這間振西學院由於取得辦學許可證，可合法地頒發本科學位及大專證書，而且全深圳只得4間，於是Orange決定租用振西其中一間位於華強北路的校舍，作為創業起點。
「我哋嘅合作方式係我會向呢間學校租用三個班房同半個Reception，共一千多平方呎地方，承辦佢旗下嘅英文課程，包括實用同商業英語；我會聘請有教育證書嘅外國老師同一、兩個文職人員。此外，因為我唔能夠申請辦學許可證，所以我要向學院租用佢嘅辦學牌照；而稅務方面亦由學院幫我搞掂。」
而所有學費都全由振西學院收取，扣除開支後，再撥歸Orange等人。不過這間振西學院並非只有Orange承辦的英文科目，他們還有時裝設計，也是由另一位投資人包辦，Orange可說是跟這位投資者分租了這間校舍。
現時報讀英文課程的學生共20多人，主要是初級英文班，學費約每月?500（共30小時），報讀的多是在職的白領階級。「呢度嘅學生興試堂，即係先免費旁聽，覺得好嘅至正式畀錢上堂，所以我哋喺班房最後排設有旁聽席。通常佢哋聽三、四堂後，我哋都會有同事跟進，差唔多百分百試課嘅學生都會畀錢讀。因為佢哋覺得我哋嘅英文課好處係由外國老師教授，學到正統英語，比好多教英文的學校優勝。」
原本暑假是開英文班的好時機，但他們聘請的外國老師，都愛在這段期間外遊，很不容易才找到這位美籍教師。「對我嚟講，最困難係搵外籍教師，而且重要有教學文憑，所以都幾難搵。但9月份我哋會有兩個外籍教師，分別會簽半年及一年合約，人工每個約萬五蚊，住喺Jacky內地嘅一間宿舍內。由於我哋𠵱家只係開咗英語班，根本收唔夠學生，所以暫時每個月都要蝕萬幾蚊。
「我打算年尾會開埋旅遊管理、物流、美容等課程，而且重會盡量跟外國嘅學校聯絡，令學生完成課程後，可以攞到外國嘅文憑。例如我有個朋友係法國一間美容學校嘅代表，佢喺度教學，學生只要考試及格，就可以得到法國美容學校頒授嘅證書。呢類課程喺內地好缺乏，因為佢哋無門路，所以就要靠我哋去聯繫。」
暫時Orange預計最少要一年後才可以完全歸本。「我哋只係小本投資，況且𠵱家學英文喺內地係一個潮流，風氣可謂吹遍大地，所以如果呢個試點成功嘅話，我哋會進軍其他地方如廣州、羅湖區等，我哋對呢行係充滿野心㗎！」
面對香港經濟不景，裁員不停，失業率持續上升，香港經濟逐步轉型，人人北望。「北上創業」版訪問一些香港人在內地成功創業的例子，如閣下是其中一分子，又願意將你的經驗跟讀者分享，請聯絡我們。來信請寄將軍澳工業邨西駿盈街八號《蘋果日報》副刊「北上創業」版收或傳真：27420542。請附聯絡電話。