樓市氣氛又再轉熱，一般市民多談論新盤銷情，估吓後市走勢，測量師就關注市況對賣地成績影響。
本年度第三次賣地會在下月10日舉行，章程應該本周五刊憲，但卓先測量師行噚日已經做定分析，先人一步估計賣地成績，預測兩幅地皮總值4.36億，認為新一輪樓盤銷售戰會帶起買樓同賣地氣氛，預期競投情況熱鬧，並吸引中小型地產商加入搶地。
呢兩幅地皮，一幅位於九龍城沙浦道，約二萬五呎，總樓面22.3萬呎，樓面呎價估計1570蚊；另一幅香港仔石排灣道前魚類統營處員工宿舍，佔地約七萬二呎，估計會以九倍四起樓，總樓面約六萬八呎，樓面呎價1260蚊。
賣地時間表政府早已公布，而賣地章程會在拍賣前一個月左右公布，所以測量師行好早已可就資料進行估值，當然，結合市場情況，在適當時間發表，就更有影響力，最重要當然係幫測量行爭取曝光率啦！