新鴻基地產副主席郭炳江個「冬菇頭」髮型一向好特別——兩邊長髮冚住耳仔；八方見佢咁多年髮型都冇變，認真長情。對呢個髮型，外界一直有好多猜測，其中一個講法係同耳仔有關，但係傳咗好多年都冇人知道真相。終於，郭炳江噚日上電台節目做嘉賓時解開咗呢個疑團。
佢講開自己年少時點樣面對挫折困難，話自己十歲時耳仔有病，住咗九個幾月醫院，手術都做咗好多次。雖然佢冇講係乜嘢病，但肯定與綁架案無關。佢話當年做手術好辛苦，瞓喺床上連郁吓個頭都唔得，心裏面只希望手術成功。
另外，郭炳江講到自己嘅會考成績。話自己成績絕對唔係名列前茅，但都唔差，最叻嗰科係中文，會考重攞到三、四個良，但係其他科目就大部份都係D同埋E。香港一直有人批評香港教育制度係填鴨式，郭炳江就另有睇法。佢話起初都覺得香港讀書壓力大，但由於經過香港教育制度嘅「嚴格」訓練，打好基礎，所以後來佢到外國讀書時，一旦壓力盡去，反而覺得輕鬆咁話。
傳真︰2623-9278
電郵︰