溫碧霞同陳法蓉噚日喺亞視總台出現，擔任亞視新節目《黃霑香港情之今時往日》記招嘅嘉賓。兩位靚女重不約而同以黑色透視裝亮相，性感迷人。
溫碧霞喺節目裏面佢會講番童年住嘅地方，佢話：「我細個住調景嶺，𠵱家搬咗，好多嘢都令我好懷念。記得十二歲時第一次同男仔kiss都係喺嗰度。」
另外，陳法蓉噚日講起屋企隻狗同工人被惡犬咬傷一事，佢依然好勞氣咁話：「前日差館同我講，話隻大狗已經放番出嚟，同埋唔會起訴個狗主，因為漁護署又告，我哋（指陳法蓉）又告，會對個狗主好唔公平。上年狗咬狗話小事，今年狗咬人又話小事，我唔會就咁算，我會從民事起訴個狗主。」
王秀琳（Mango）噚日去新城電台做訪問，佢話早幾日搭的士唔記得帶銀包，最後司機容許佢夜啲畀番錢，佢話：「本來車錢得十幾蚊，後尾連貼士畀咗三十蚊。」Mango重話有次同朋友鬧交，心情唔好開快車，搞到差啲撞車。
台灣搖滾天王伍佰前晚喺新加坡舉行「伍佰&ChinaBlue九重天演唱會」，一向表現得好cool嘅伍佰，今次喺演唱會中有大突破，就係着西裝喺台上獻唱，引得全場爆出一陣笑聲。雖然俾觀眾笑，但係伍佰都好落力演出，唱咗好多首首本名曲，包括《親愛的你》同《愛你一萬年》。
組合Shine日前應商台節目《少爺占的快樂頌！夏》之邀，訪問黃貫中（阿Paul、右一）。原來Shine一直視黃貫中為偶像，當佢哋同阿Paul見面時，重緊張到唔敢講嘢，只係細心聽阿Paul講述音樂心得，最後連阿Paul都忍唔住問：「你兩個做乜唔出聲呀？」Shine重得償所願同阿Pauljam歌，但佢哋都只顧睇住阿Paul彈結他。
張惠妹噚日三十歲牛一，佢噚晚喺杭州舉行演唱會，同現場五萬名觀眾一齊歡度生日，阿妹所屬嘅台灣華納唱片重收到消息，話杭州一間做西餅蛋糕嘅舖頭，會做個破紀錄嘅超大蛋糕賀阿妹生日。阿妹嘅生日願望係：「希望新專輯得到好成績，巡迴演唱會成功。」
陳見飛噚日去港台做訪問。講到近排新人輩出，問佢驚唔驚壓力大，佢即時眼紅紅咁話：「有壓力㗎，我又唔覺自己叻過人，惟有努力啲，我由瞓醒到瞓覺都諗要做好啲。」至於有報道話佢爹哋陳澤民因細股災勁蝕一億，佢就話：「冇聽過，亦唔覺佢唔開心，噚日重一家人去食飯同我預祝生日。」
周永恒（Roy）噚日去新城電台接受訪問，佢話前日去咗人民入境事務處攞成人身份證，阿Roy話有個四十幾歲嘅職員無端端問佢寫好晒啲歌未，周圍啲人又望實佢，搞到佢覺得好尷尬。阿Roy又話想盡快考車牌，不過就只會買架平車，因為佢話新牌仔一定會撞車。
許志安（安仔）噚日喺港台拍攝宣傳短片。安仔十二號三十五歲生日，港台提早送上有安仔肖像嘅生日蛋糕。安仔嘅生日願望，同鄭秀文（Sammi）早前嘅願望一樣，希望可以減少工作，安仔話：「我好想好似張學友咁減少宣傳，貴精不貴多，最好一年拍一套戲同埋做一次演唱會。」