為預祝十月正式踏入15周年,吉之島每個月中旬,都會舉行「周年感謝超特賣」,現時至下周三即有「周年均一價貨品」,部份貨品均以十五蚊、百五蚊等超值價出售,好似一套有三樣產品嘅日本Kawai梨,原價要成二百幾蚊,家陣只係一百五十蚊,計落相當抵㗎。另外由今日起至本月二十一日,全線吉之島都做緊四洲日本食品展銷節,展銷嘅食品都好抵,總之行入吉之島總有你着數啦!
記者:陳冰麗攝影:周旭文
ImageGirl:Queenie
周年均一價推介
一套包括有一罐80粒嘅鈣糖、一罐100粒嘅日本魚肝油丸及一盒18粒嘅EC維他命丸。家陣只係百五蚊,比原價足足平五十五蚊。成日怕小朋友食糖無益,呢款套裝有齊鈣糖、魚肝油丸及維他命丸,絕對有益得多,相信係父母嘅首選啦!
特價$150套
原價$205套
平時買定啲餅乾看門口,等肚餓時就可以隨時攞出嚟作為醫肚方便小食。呢款必勝佳優惠裝餅乾,一套有三種唔同口味嘅餅乾在內,包括有朱古力餅、梳打餅及茶餅各一包,三種餅乾都各有風味,餅乾又夠香脆,作為醫肚或下午茶小食都啱呢。
特價$15套
原價$22.5套
飲涼茶點都比飲汽水有益得多,尤其是家陣仔女放緊暑假,為免佢哋打開雪櫃就攞汽水飲,最佳方法就係減少買汽水,況且家陣飲涼茶分分鐘重抵過飲汽水。正在減價嘅同治堂涼茶,1.5公升裝只係十五蚊,相當抵飲,不過現時只係雞骨草及夏枯草做特價。
特價$15/1.5公升
原價$19.9/1.5公升
鍾意飲啤酒嘅人,喺炎炎夏日裏自然唔少得啤酒一份,介紹大家飲呢款海珠啤酒,中國出品,勝在價錢平,一罐335毫升容量,平時平均都只係四個幾,家陣更加抵飲,每罐只係三個幾,閒時鍾意啤一啤,大可以考慮吓呢隻經濟裝啤酒。
特價$15/4罐
原價$18/4罐
其他抵買推介
屋企啲雪糕、雪條將近食晒嘅話,不妨趁減價入定貨。本周大冧價有阿波蘿雪糕、雪條,全部只係原價嘅一半價錢,相當抵,選擇包括有6支裝呍呢拿脆皮、8支裝嘅夾心雪條等,全部只係$12袋,另$10袋,則係分別有朱古力、呍呢拿、芒果及芋頭四種口味嘅雪糕。
雪條特價$12袋原價$24袋
雪糕特價$10袋原價$20袋
Topvalu烏龍茶係吉之島自己品牌,採用中國茶葉鐵觀音、水仙為原料,再經日本製造,品質絕對有保證。呢款烏龍茶無添加糖或任何色素,所以大可以放心飲,茶味濃郁,現兩公升都唔使二十蚊,確實抵飲。
售價$19.9/2公升
帶有網紋嘅蜜瓜原產地日本,平時一個至少要幾十蚊,不過呢款網紋蜜瓜則經濟好多,一個只係十幾蚊,大概有三、四磅重,咁平係因為祖國出產,由日本取種移至中國種植,雖然味道稍為淡啲,但整體質素與日本種相差唔多。
售價$15.9個
Sunmagic果汁由荷蘭入口,果汁全部百分百以鮮果製造,有車厘子、西柚、橙、蘋果、菠蘿多種口味。開Party作為招呼朋友就最啱,家陣1公升裝只需要十蚊多啲,真係比汽水更加抵飲。
特價$10.5/1公升
原價$14.9/1公升
四洲日本食品推介
閣下係大胃王嘅話,一個普通裝杯麵都未必夠飽,不過有咗大碗麵嘅出現,問題就不大,因為一個大碗麵幾乎相等於兩個半普通杯麵份量。平時一個大碗麵閒閒哋都要十幾蚊,家陣七蚊都唔使,重係日本四洲出品,有紅燒牛肉及排骨酥麵,兩者都分別附有鮮肉、辣油及調味包在內,只要加熱就食得。
特價$6.9碗
原價$13.9碗
炎炎夏日無胃口,食少少咖喱有助增加食慾。買現成有齊料及汁嘅咖喱自然係方便之選。由日本出產嘅好侍咖喱樂,咖喱味濃郁,不太辣,比較適合港人口味。
家陣買兩盒只係十蚊,平時一盒都接近呢個價,有少辣及中辣供選擇。
特價$10/2盒
原價$9.9盒
四洲出品Pokka百佳牌,大家應該唔會太陌生,今次推出兩款鮮果汁,包括有橙汁及蘋果汁,成份天然,不含人造色素,大可以放心畀小朋友飲用,而且佢甜度適中,唔會話愈飲愈渴嘅感覺。除果汁外,檸檬紅茶都係唔錯嘅選擇,全部容量350毫升,家陣特價只係$4.3樽。
特價$4.3樽
原價$5.9樽
市面上愈出愈多烏龍茶,飲用烏龍茶好處多,解渴又怡神,食滯咗重有去油膩、助消化作用㖭!Pokka烏龍茶係一款無加糖及色素嘅健康飲品,雪凍飲更解渴,男女老少都啱飲。
特價$3.2罐
原價$4.6罐