恒指昨日雖然重上萬點，但走勢唔算靚。受美股杜指隔晚大升255點刺激，恒指裂口高開，中午時殺上全日高位10149，但受制於5月延伸下來嘅下降軌，午後升幅逐步收窄，結果恒指幾以全日低位10014收市，僅升51點。
港股走勢雖然麻麻，但後市如何還看美股。美股亦已升抵重要阻力位，若昨晚能夠破位而上，港股應有動力突破降軌，否則便要整固，甚至再試9600水平嘅支持。
中電（002）是日派中期成績表，純利增長近24%，主要因為有地產項目入帳。第2次中期息派38仙，相當唔錯。雖然績佳派送好，但中電股價未受刺激，只能平收30.80元。
不過，3件中電Call輪昨日都有升幅。最近期嗰件9171升9%，下月20日到期，槓桿率13.1倍，負溢價0.28%，即使計入除息因素，溢價仍不足1%。
唔想玩末日輪，可以考慮9183，11月到期，槓桿率15.5倍，溢價0.5%，除息計亦唔使2%，數據仍靚。餘下嗰件中電輪9353係盈息認股證，有股息收，呢件成交好疏，啱揸唔啱炒。
章 盛