潮流興將舊史翻番出嚟，好多大作都會推出故事前傳，連電影都唔例外。今次輪到CAPCOM旗下皇牌遊戲《Biohazard》推出前傳版本，名為《BiohazardZero》，遊戲暫定十一月先推出，不過試玩版已經率先到港，而且內容頗為豐富，今日就為大家報道一下呢款勁作有乜新睇頭。
記者、攝影：徐影龍
(C)CAPCOMCO.,LTD.2002
故事講述熊市發生多宗離奇殺人事件，特別部隊「S.T.A.R.S」奉命前往調查，在前往途中發生不明原因而迷路，其中一名隊員Rebecca更發現一列神秘火車，上車調查之際火車突然暴走駛出，Rebecca便迫於獨自一人在車上找尋出路，之後更遇上車上一名逃犯Billy，面對車上喪屍及種種神秘事件，二人合作逃出生天，整個故事便圍繞Rebecca同Billy而發展。
試玩版主要提供開頭呢段火車情節作試玩，玩家可先熟習一人戰鬥操控，之後遇到Billy後便可感受其嶄新嘅操控二人系統，在後段則以大戰蠍王作結束，整個流程第一次玩約莫需時三十分鐘至一小時。
過往《Biohazard》系列在操作上萬變不離其宗，為咗畀玩家有新鮮感，將過往按劇情分支而操控唔同人物嘅特色加以改良，首度引入一次過控制Rebecca同Billy兩名角色嘅系統，玩家可隨時按掣轉換操控角色，從而獲得某項特殊道具，如試玩版嘅車長鎖匙便需二人分別拾取金、銀圓環，再組合喺皮包上先攞到，又或互相交換武器及子彈等，另外在試玩版中段二人會有碰頭機會，之後其中一方便由電腦暫代操控，玩家亦可預早定下電腦AI指令，如幫手攻擊敵人、呆企、分頭搜索等，呢個系統概念非常之新鮮，在試玩過後亦發覺做得非常好，解謎程序有更大變化，戰鬥時面對複數喪屍都較易應付，值得一讚。
當初CAPCOM在宣布推出《BiohazardZero》時係以任天堂N64作平台，不過就拖到今時今日先喺GAMECUBE上推出，若配合之後推出系列中其他續篇，整個系列便非常完整，雖然姍姍來遲，不過畫面上憑着GAMECUBE機能得以大幅強化，不單背景畫面做得出色，就連周圍毫不起眼嘅物件，都經過細心處理，如火車餐卡上嘅杯碟、酒樽等物件，都會隨住火車擺動而四處碰撞，更會發出唔同嘅聲響，加上出色嘅光源處理，令臨場感更為強烈，玩家能完全感受嗰種恐怖壓迫感。
《BiohazardZero》喺十一月先正式推出，不過若在日本預訂，可獲得一隻CAPCOM送出嘅體驗版優先試玩，而呢批試玩版例牌咁有部份貨源流入香港，不過數目未算多，好多Game舖只當Demo展示畀客人睇，不過有啲就奇貨可居，將非賣品出售，重要賣到$180，都算識把握機會。若果你身為Fans而又唔想俾人咁屈錢，筆者發現灣仔DreamStore畀二百蚊預訂《BiohazardZero》，就可以獲得一隻體驗版，而且到正式發售時會按CAPCOM官方價錢售賣（暫定7800日圓，約港幣$500），唔怕出現炒風又俾人屈一筆。
售賣點：DreamStore
地址：灣仔東方188商場256號舖
電話：25753285
對應機種：GAMECUBE
開發商：CAPCOM
遊戲類型：動作＋解謎
遊玩人數：一人