美股過去大半個月走勢認真波動，杜指上周四至本周一3個交易日跌702點，但由周二至周四又升番669點，前晚收8712，升近之前頂部8762，美股噚晚走勢相當關鍵，如果升破8762，則有機上試50日線（現處8990）。不過就算升唔穿，只要唔跌穿短期升軌支持（現處8180），技術仍係偏好。
港股噚日高開低收，只升51點，收10014，明顯受制於5月延伸至今的降軌阻力，但假期前加上市場觀望美股噚晚走勢，尾市出現獲利回吐亦十分正常，若美股周五晚升破前高位收市，則恒指下周一料可升破降軌阻力。恒指本周雖只升22點，但都叫做連升兩周。技術指標亦漸有改善，MACD線輕微上破訊號線，且看下周趨勢會否持續。
有讀者話趙飛雲炒輪太短線，好難跟炒。事實上，趙飛雲已盡量做到預先張揚買貨及沽貨，希望讀者見諒。既然有人咁講，今日推介一隻有機炒業績嘅百江燃氣（8132）。在國內賣石油氣嘅百江下周二公布中期業績，今次業績照計會唔錯，所以買咗5萬股捧場。百江現價往績PE52倍，看似十分偏高，但估計將來公布全年業績後，PE會回落至正常十餘倍水平。睇走勢有機上試50日線3.25元至3.40元，可作獲利目標。另一方面，跌穿橫行區底部2.65元，必須止蝕。
趙飛雲