滙豐銀行、恒生銀行宣佈中期業績，雖然純利倒退，但跌得好少，出乎我哋意料之外。呢兩間銀行啲管理的確好嘢，能夠控制成本，擴充新業務，做得十分出色。譬如恒生嘅理財服務收入增加六十二巴仙，其中零售基金管理及分銷費用收入增加咗二點一倍，達四億七千萬，人壽保險銷售佣金亦增加六十巴仙。
唔怪得之，滙豐銀行嘅理財公關可以不惜工本，七月中租用君悅酒店搞投資騷，成千幾個客戶參加，一日就用咗起碼三十萬。既然從理財產品方面賺咁多錢，請客戶去君悅聽演講兼食精美茶點，濕濕碎啦。其實滙豐啲上頭好識慳錢，若非有利可圖，點都唔會用三十幾萬嚟搞投資騷。
呢邊搞騷冧啲散戶，柯總經理就去冧大戶。上星期喺西麗湖高爾夫球場，柯總就同田氏兄弟北俊、北辰以及郭炳聯一齊打高爾夫，聯絡感情。據賓架L話，𠵱家唔識打高爾夫嘅，就冇資格做銀行老總，唔打波，用乜方法與客戶增進友誼呀？師傅嗰代嘅上舞廳、打麻將、焗桑拿、打網球、壁球，統統落後晒，完全不管用！賓架L個世姪喺深圳讀大學，六年先至畢業，佢老頭子本來有啲不耐煩，但世姪原來花咗好多時間喺高爾夫球場，現在打波叻到係singlehandicap，咁又唔同講法，起碼入到銀行做trainee，多一樣升職本錢，如果入咗銀行先至去學打波，機會成本好高啫！