美股連續第3日大升，港股則只係微升，收10014，升51點，成交增加至58億元，市場氣氛仍然審慎。不過樓市就幾熱鬧，珀麗灣首日開售，雖然天文台發黃雨警告，但下午3點鐘前已經出現等車睇樓人龍。其實香港有錢人唔少，但係今時今日搵錢唔易，所以有錢都唔敢亂使，但面對居屋價錢嘅六星級樓盤，真係連阿虎都流口水，特別係嗰個「海天壹色」單位，只可惜阿虎嘅財富已經隨着二手樓市持續下滑而縮水，重邊有錢去諗個「海天壹色」？若二手樓市持續不振，咪講話樓市，地產股與二三線股都好難翻身。
市場傳出，持有國基資訊（205）29.67%嘅UnitedHome有意向國基注資，順便增加持股量，但就唔會提出全面收購。據聞注入嘅資產會係近期經常踢爆民企有問題帳目醜聞嘅國內《財經》雜誌及《證券市場周刊》。傳聞呢兩本雜誌與官府關係密切，被爆醜聞嘅民企奈佢唔何。不過，傳媒業務在國內一向都係敏感行業，呢單deal唔知會否咁易做得成？
前日佐丹奴（709）公布業績，管理層講過一番說話實在值得大家深思，大致係話國內主要城市店舖租金貴到飛起，猶如香港97年時狀況。中國入世，資金一窩蜂湧入中國，造成經濟泡沫而最後爆破，呢啲係阿虎一直所擔心。
國內租金上升但電價就被人為壓價，據聞有美資行開始建議客戶減持華能（902），山東國電（1071）及北京大唐（991），至於合併重組概念暫時唔好諗住，因為就算真係有合併組重，都未必一定係好事。
阿 虎