「我等換肝等咗七年，𠵱家搞到咁樣嘥咗個肝，我真係覺得好可惜，亦好𤷪𤺧！咁樣搞法真係累死啲病人！」何先生於七年前證實患上嚴重肝硬化，曾被斷定「幾乎冇得醫」，但輾輾轉轉至今仍未有機會換肝，每日須服食二十多粒藥，他悲觀地表示：「等換肝不如等死！」
現年四十六歲的何先生，一直從事雜工工作，九五年年中的一個晚上開始了他的噩夢，「嗰晚食完飯行行吓街突然好暈，又嘔得好厲害！」經醫生轉介到瑪麗醫院詳細檢查後，證實患上嚴重肝硬化、胃出血及腹膜炎，當時有醫生向他表示可能只有數個月性命，他坦言當時「絕望到想跳樓死咗佢！」惟稍後有醫生建議他換肝，何先生遂充滿希望。
「醫生同我講，話通常要等兩年，叫我定期食藥同覆診控制病情，點之佢之後話我重未死得住，所以要再排吓隊先有得換！」如是者何先生一等便是七年，每次覆診時醫生均向他表示未有適合的肝，他自言已等到非常「麻木」，前年曾試過病情惡化在家中嘔了一大灘血，但始終仍無機會換肝。
何先生每月靠七千多元綜援金過活。他三名子女均是乙型肝炎帶菌者，雖然他對換肝已幾乎絕望，但仍抱着一點點希望，「有頭髮邊個想做瘌痢，早啲換番個肝我可以做番嘢，都唔使靠政府，同埋可以睇吓點醫三個仔女。」對於今次平白浪費了一個對何先生來說非常珍貴的肝臟，他顯得甚為痛心，「𠵱家成日望天打卦等人捐肝，政府真係要檢討吓啲政策，如果唔係有人捐都冇用！」
本報記者