星期一大清早，訴苦Sam打電話嚟報料，原來關刀剛剛返行貨，一Set三款日本推出冇耐即被搶爆倉嘅啡黃系關刀，香港以極抵買嘅原價發售，基本上整條花園街嘅貨已被日本仔、韓仔Hold起晒，其他街客只有執死雞，四處碰吓運氣。訴苦Sam話貨尾亦於個半鐘內被掃光，呢次算係近期關刀嘅代表作。
波鞋巿算係近年一枝獨秀，無論個巿點死都有得做，連帶沉靜一輪嘅假鞋倉最近又再翻生，聽訴苦Sam講近排賣假鞋最出名嘅喺荔枝角，專賣高級關刀假鞋，今個月就力谷烏粉，全個倉差唔多淨係賣假烏粉，以貼近巿價賣，齊色又齊Size，店員又有Sense，所以好容易令人上當。平日喺旺區派單張招客，單張設計都算追上潮流。𠵱家做假貨班老闆比起以前肯用腦，聽講散完呢批假烏粉後就向彈弓鞋埋手，各關刀迷千萬要小心。
主持人：大食Jack
八卦熱報：