日日困喺石屎大廈裏面做做做，返到屋企又係對住四幅牆，開電視又睇到咩自殺、失業、雙失，個人又點會開心？一齊嚟跟我去馬來西亞一個未被污染的長方形小島LayangLayang風流快活吧（體驗海「風」從你面頰上「流」過的「快活」感覺），就算只得6、7日假期，都算係享受過真正人生吖！
記者：朱維達
由香港至LayangLayang，需要轉搭內陸機，過程係咁樣嘅：香港→3小時機程到KotaKinabalu（KK）→轉機1小時到LayangLayang
逢星期一至六都有航機由香港飛往KK（逢星期二、五為港龍、星期一、三、四、六為馬航），搭邊班機就要視乎你嘅假期，因為港龍係早機，馬航則為下晝機，不過就算揀邊一間都係要喺KK停一晚，因為由KK接駁至LayangLayang嘅內陸機（只可載11位乘客），除咗復活節等假期，其餘時間每日只會得一班，就係晨早6點半！當然，若果搭港龍，中午時分就到KK，下晝可以到此逛逛！
早前曾有聞該區遊客被菲律賓游擊隊擄走事件，到LayangLayang相信都好難案件重演，皆因島上有一個軍事基地，保證安全。至於長方形島嶼當然唔係自然形成，查實係一條長長嘅跑道。
遊客坐內陸機降落後，只需步行1分鐘，即到島上唯一兼提供86間客房嘅度假村LayangLayangIslandResort，方便之極。由於軍事基地與度假村有圍欄相隔，加上每日亦只得1班機於朝早約7點半到達（呢個時候絕大部份遊客都已經出海潛水），所以無噪音騷擾問題，亦由於LayangLayang唔似其他同區小島大量開發，Resort一間接一間，環境污染問題日趨嚴重，僅得一間LayangLayangIslandResort一直以嚟都無污染問題，加上每年11月至2月該區風高浪急，Resort會相應休業，水質亦因此得以保證。
LayangLayang嘅黃金檔期為每年三月至九月，島上可以做四樣嘢，除咗食同瞓之外，就係觀賞萬鳥歸巢嘅奇景。
於軍事基地另一面嘅地方有一個大平原，亦係各種雀鳥嘅棲息地方，由Resort前往觀鳥亭只係約5分鐘步程，此觀鳥亭話雖名為觀鳥，其實即係雀屎亭，有位坐不得，海燕、信天翁等每到日落黃昏，就會齊集此處，數量可以用驚人嚟形容。
或者係鳥多「恰」人少，當你行埋去時，佢哋一啲都唔會怕你，若果你去嘗試摸佢哋，就算外形馴良嘅小鳥都會無情咁來個恨恨一吻。不過最難忘嘅都算係佢哋啲雀聲，當你離開Resort範圍，就已經開始聽到，到咗「雀屎亭」就差啲要用隻手蓋耳，真係重噪過沙田街市！
最後一樣亦係必做項目當然係潛水。LayangLayang既然由13個珊瑚島組成，潛水位就最少有10個以上，不過最好係未天光及傍晚5至6點潛水，因為呢兩段分別係魚群出外覓食及回程時間，魚群數目最多，尤其係早潛，雖然晨早起身眼屎都未抹淨就要落水，但係呢個時候亦係水質最清嘅時候（平均能見度達150呎），而潛至水深120呎就可以睇到呢度最出名嘅「特產」──Hammerhead雙髻鯊（俗稱錘頭鯊），至於其他好似鐵頭魚、炮彈魚、魟魚等都會一一展現喺你眼前。
LayangLayangIslandResortSdnBhd
預訂辦事處：BlockA,GroundFloor,A-0-3,MeganPhileoAvenue,12JalanYapKwanSeng,50450KualaLumpur,Malaysia
電話：（60）3-21622877
傳真：（60）3-21622980
網址：
套餐：由現在至10月31日推出6日5夜套餐，包括內陸機往返、導遊、1日5餐、1日3潛及潛水裝備，費用為1,095美元（約8,541港元），但未包由KK來回香港機票，票價視乎季節而定一般為$2,800-$4,000。
出門提一提
簽證：BNO、特區護照持有人免簽證，CI持有者則須辦理。查詢：28210818（馬來西亞領事館）
套餐：可購買6日5夜潛水套餐，包括香港往返KK及LayangLayang機票、酒店住宿、每日三次潛水裝備供應，雙人同行價每人$10,480。
查詢電話：29261668（SunnSeaHoildays）
網址：
機票：乘坐馬航或港龍往KK，一個月有效期票價$3,400。查詢：28453232（專業旅運）