一位讀者「阿邦」來電郵，附一首詩，話係佢家中一幅字畫，要求知道出處，好等佢「附庸風雅一番」。內文為：
儂芳依翠萼，煥爛一庭中。寒露霑如醉，殘霞照似融。丹青難下筆，造化獨留功。舞蝶迷香徑，翩翩逐晚風。
幾乎考起，似讀過但唔多記得。好彩科技進步，互聯網無處不在，上網一查，知道此為宋徽宗（1082-1135）詩帖，原來真迹係宋徽宗瘦金體書法字迹遺留下來之中最大嘅，每字大近五寸。「阿邦」家中字畫，唔係真迹啩？否則你發達咯！
長期讀者「華德」傳來一份佢嘅老友記搵出嚟嘅名詞新解，幽默抵死，部份可以供諸同好。
父親──大自然提供嘅賓架。
孤寒鐸──一個活得貧窮以求死得富有嘅人。
波士──永遠係你遲到佢早到，你早到佢遲返工嘅人物。
經典作品──人人讚，冇人讀嘅書。
離婚──結婚嘅未來式。
醫生──一個用藥丸殺死你的病，用帳單殺死你的人。
經驗──過往錯誤的代名詞。
講課（lecture）──一種不經思考分析、將講師筆記簿上嘅資料傳送到學生筆記簿上嘅藝術。
「華德」睇英文原文，笑到樂不可支，只是呢個係中文專欄，只能夾硬翻譯，希望詞能達意。