近排日圓高企，但香港各大車行不僅無加價，部份代理更以割價招徠；有見及此，就連水貨車行亦加入戰團，好似呢部至新款嘅EstimaBilletGrilleVersion咁，更以標榜入時至In同車價吸引為賣點。若然你正想擁有一部咁新兼有型嘅MPV的話，呢部EstimaBilletGrilleVersion的確係唔錯嘅選擇噃！
特約記者、攝影：張以中
新車售價：$329,000（標準版）
車輛提供：富利堡汽車（28776700）
豐田Estima極為香港人追捧，亦好切合現今呢股MPV熱潮，而且重屢見廠方有推陳出新嘅型號；正如呢部BilletGrilleVersion咁，一身純白BodyColour，匹配全新電鍍鬼面罩、一體式泵把連雙列式氣霸，重有兩邊四盞霧燈組合，加埋全車包圍同尾定翼，賣相既獨特又吸引㗎！
至於車廂鋪排方面，三排座椅各備有手枕同頭枕外，中排座椅重各置有腳枕，從而給予乘客有更妥貼舒適嘅享受；而三排座椅相互組合，重可以變換成闊大嘅卧鋪，將尾排座椅收摺起，能令尾廂空間倍增外，另外重備有四門電窗、門邊電鏡及中央門鎖，兼有雙天窗、前後獨立恒溫冷氣、房燈及雙安全氣袋配搭，設備可算係應有盡有㗎！
呢款Estima匹配一台3.0公升V6偈，以及軚式4前速自動波，起步加速有勁又見寧靜，軟硬適中嘅懸掛設計，加上低重心車架結構，重給人有穩妥嘅循迹感㗎！而四輪可靠嘅制動裝備，配合上ABS連EBD裝置，重予人有多一份安全感㖭。