中建電訊（138）同埋海爾中建（1169）股價早排跌到一仆一碌，噚日海爾中建停牌，而中建股價就升13%，收94仙。經紀黃話得力於海爾中建有動作。
經紀黃話，缸湖傳聞海爾將繼續注資海爾中建，復牌後可留意，所以冇停牌嘅中建電訊受到追捧，但成交金額同以往比較就真係少得交關，只得142萬元咁多。
中建上次供股之後，股價只係郁過一陣，之後就浮浮沉沉，早排新聞更只係在娛樂版出現嘅胡鬚麥大戰劉天王，搞到成班供股捧場客全部死心。
至於海爾中建，批股之後都未曾好過，重一度位列仙班，前日未停牌前股價一度急升，睇怕都係春江鴨出嚟搵食。
若果係市旺之時，呢類注資新聞可以炒鋪勁，但今時今日就真係難搵人跟炒，除非搵到條大水喉先至有得諗。
慕容小初